

D1751

། །།ཁ་ཆེའི་པཎྜི་ཏ་སུ་མ་ན་ཤྲཱི་དང་། བོད་ཀྱི་ལོ་ཙཱ་བ་དགེ་སློང་རིན་ཆེན་གྲུབ་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། @##། །རྒྱ་གར་སྐད་དུ། པདྨ་ཨཱ་བ་ལོ་ཀི་ཏེ་ཤྭ་ར་སྱ་པདྨ་ཛཱ་ལ་ཀྲ་མེ་ཎ་བྷ་ག་བ་ཏེ་མཎྜལ པཱུ་ཛཱ་བིདྷིཿ།བོད་སྐད་དུ། པདྨ་སྤྱན་རས་གཟིགས་དབང་ཕྱུག་གི་པདྨ་དྲ་བའི་རིམ་པས་བཅོམ་ལྡན་འདས་ཀྱི་དཀྱིལ་འཁོར་དུ་མཆོད་པའི་ཆོ་ག་།འཕགས་པ་སྤྱན་རས་གཟིགས་དབང་ཕྱུག་པདྨ་དྲ་བ་ལ་ཕྱག་འཚལ་ལོ། །མཐའ་མེད་འཁོར་བའི་རྒྱ་མཚོ་ཡི། །ནང་དུ་རྒྱུ་བའི་ འཇིག་རྟེན་རྣམས།།མངའ་བདག་ཐུགས་རྗེས་ནོན་པས་འདོན། །འཇིག་རྟེན་དབང་ཕྱུག་རྒྱལ་གྱུར་ཅིག་།ཀུན་མཁྱེན་གྱིས་ཀྱང་ལེགས་ཤེས་མིན། །ཟབ་ཅིང་རྒྱ་ཆེའི་ཆུ་གཏེར་ནི། །པདྨའི་ཕྱག་གིས་ཐུགས་རྗེས་མཁྱེན། །བརླིང་པར་མཛད་པ་ལ་ཕྱག་འཚལ། །བནྡུ་ཀ་ དང་སེ་འབྲུ་མཚལ་བཟངས་པདྨ་རཱ་ག་དང་།།རྒྱ་སྐྱེགས་ཁུ་བ་ཞུ་བ་དམར་པོའི་གདན་དང་པདྨ་གསེར། །སྣང་ལས་རྣམ་པར་རྒྱལ་ནས་ཐུགས་རྗེས་དམར་པོའི་མཆོག་གི་སྐུ། །འཇིག་རྟེན་དབང་ཕྱུག་བླ་མ་འདི་ནི་མཆོག་གསལ་རྣམ་སྣང་བྱེད། །དེ་ནི་སེམས་ཅན་ཐམས་ཅད་ཡོན་ ཏན་ཕུན་ཚོགས་ཀུན་འཛིན་པ།།འཇིག་རྟེན་དབང་གི་དབུ་ལ་རྟག་ཏུ་ཡང་དག་གནས་བཅས་པ། །འདོད་ཆགས་ལ་སོགས་ཉེས་པ་བཞི་ལྡན་བདེ་བར་གཤེགས་པའི་གཙོ། །ཡོན་ཏན་མང་པོ་ཡང་དག་གནས་པའི་འོད་དཔག་མེད་ལ་འདུད། །པདྨ་རཱ་ག་རྣམ་པར་ བདར་དང་གསེར་དང་སྣང་བྱེད་འོད།།ཚོགས་རྣམས་རབ་འཛག་བྱུ་རུའི་སྡོང་པོ་ཟངས་དང་མཚལ་བཟངས་མཛེས། །མཁའ་མཉམ་སྣང་བ་མཐའ་ཡས་ཡོན་ཏན་རྒྱ་ཆེ་འོད་དཔག་མེད། །བཅོམ་ལྡན་འཇིག་རྟེན་མགོན་པོའི་ཅོད་པན་རྒྱན་གྱུར་ལ་ཕྱག་འཚལ། །གང་གིས་སངས་ རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་མི་ཤེས་པའི་སྤྱོད་པ་ནི་བདག་གི་པགས་པའི་མིག་གི་སྐུ་བཞིའི་ངོ་བོའི་རང་གི་ངོ་བོ་དཀྱིལ་འཁོར་མཆོད་པའི་ཆོ་ག་བརྗོད་པར་བྱའོ།།དེ་ཡང་བདག་ཉིད་བཞད་གད་དུ་བྱེད་པ་གལ་ཏེ་ཡང་། དེ་ལྟ་ན་ཡང་དེའི་དྲིན་ འདིས།།ཚོགས་རྣམས་བདག་ལ་ཆེན་པོར་འཆར། །གང་གི་རྒྱུ་མཚན་དེ་རྣམས་ནི། །ནོར་ལྷའི་ཕྲིན་ལས་བཟང་པོ་རྣམས། །དེ་ཕྱིར་གཞན་ལ་ཕན་དོན་དུ། །ཇི་བཞིན་པ་ནི་མ་ཡིན་ཡང་། །ཡོངས་སུ་ངལ་གང་ལེགས་པ་ཡི། །ཤིན་ཏུ་ཆུང་གྱུར་ཀྱང་མཛེས་ བྱེད།།མཆོད་པའི་ཆོ་ག་དམ་པའི་ལམ། །ལེགས་པ་དེ་འདི་མཉེས་གྱུར་ཅིག་།ཅུང་ཟད་ཅི་ཡང་ཤེས་བྱེད་པ། །ལས་ཐམས་ཅད་པ་བདག་གིས་བརྗོད། །དང་པོ་རེ་ཞིག་ཚངས་པའི་ཡུད་ཙམ་ལ་རྡོ་རྗེ་སློབ་དཔོན་སྟན་ལས་ལངས་ནས་གོས་ཡོངས་སུ་བགོས་ཏེ་ལྷའི་ངག་གི་ ཐ་སྙད་བྱ་ཞིང་འཇིག་རྟེན་པའི་ཕལ་པའི་སྐད་ཀྱིས་འདྲིས་པ་ཡོངས་སུ་སྤངས་པའམ།མི་སྨྲ་བར་བྱས་པ་ཕྱི་རོལ་གྱི་སར་གཙང་སྦྲའི་ཕྱེད་དུ་ཡང་དག་པར་བརྟེན་པར་བྱའོ། །དེ་ལ་ཉི་མ་སྔ་དྲོ་ཁ་ཤར་ལ་ཕྱོགས་པ་དང་། ཉི་མ་གུང་ལ་ལྷོར་ཕྱོགས་པ་དང་། དགོངས་མོ་ནུབ་ཏུ་ཕྱོགས་ པས་ཉེ་བར་འདུག་སྟེ་ལངས་ནས་རྟགས་ལ་གཅིག་དང་བཤང་ལམ་ལ་གསུམ་དང་དེ་བཞིན་དུ་ལག་པ་གཡོན་པ་ལ་བཅུ་དང་གཉི་ག་ལ་བདུན་སྦྱིན་པར་བྱ་བས་དག་པར་མངོན་པར་འདོད་དོ་ཞེས་པའི་རིམ་པས་གཙང་སྦྲ་བྱའོ།།དེ་ནས་སླར་ཡང་ཁ་བཤལ་ནས་དལ་གྱིས་དཀྱིལ་འཁོར་གྱི་ ཁང་པར་འཇུག་པར་བྱའོ།།ཞུགས་ནས་ཨོཾ་སརྦ་ཏ་ཐཱ་ག་ཏཱ་ནཱཾ་པཱ་ད་བནྡ་ནཾ་ཀཱ་རོ་མི། ཨོཾ་ན་མཿསརྦ་བུདྡྷ་བོ་དྷི་ས་ཏྭེ་བྷྱཿད་ཤ་དིཀ་ལོ་ཀ་དྷཱ་ཏུ་བྱ་བསྠི་ཏེ་བྷྱཿས་སྲ་བ་ཀ་པྲ་ཏེ་ཀ་བུདྡྷེ་བྷྱ། ཞེས་པས་ཤར་དང་ལྷོ་དང་ནུབ་དང་བྱང་དུ་བསྐོར་བས་ཕྱག་བྱའོ། །དེ་ནས་འཇམ་པའི་སྟན་ལ་ཡང་དག་པར་ཉེ་བར་ འདུག་ནས།བླ་མ་བདག་ཉིད་གང་དུ་བྲིས་པའི་དཀྱིལ་འཁོར་གྱི་ཤར་གྱི་ཆར་ཁ་ནུབ་ཕྱོགས་པའམ་གལ་ཏེ་མ་ཡིན་ཏེ་བྲིས་པའི་དཀྱིལ་འཁོར་མེད་ན་དེའི་ཚེ་སྟོན་པ་པོ་བློ་བཟང་པོས་གལ་ཏེ་ས་ལ་ཁ་ཤར་དུ་ཕྱོགས་པར་གྱུར་ནས་ཡེ་ཤེས་ཀྱི་ལྷ་ལ་མཆོད་པ་བྱའོ་ཞེས་གསུངས་པའི་ཕྱིར། དེ་ལ་ ཨོཾ་བཛྲ་ཨུ་ད་ཀ་ཧཱུཾ་ཞེས་ཁྱོར་བའི་ཆུ་ལ་མངོན་པར་བསྔགས་ཏེ་ཆུའི་ཉེས་པ་བསལ་ནས་ལན་གསུམ་དུ་མགོ་ལ་མངོན་པར་བསྐུར་བར་བྱའོ།།དེ་ནས་ཨོཾ་བཛྲ་ཨུ་ད་ཀ་མ་མཱ་ཤྲཱི་པདྨ་ཨ་ཝ་ལོ་ཀི་ཏེ་ཤྭ་ར་མུ་ནེ་བ་ར་མ་པ་ར་མ་ཨ་ནུ་ཏ་ནོ་ཨཱ་ན་ན་ཨཱ་དི་ཤུདྡྷཾ་གུ་རུ་སྭཱ་ཧཱ། ཞེས་པས་ལག་པ་དང་གདོང་ ཁྲུས་བྱའོ།།དེ་ནས་བསམ་གཏན་གྱི་ཕྱག་རྒྱ་བཅིངས་ལ། བཅོམ་ལྡན་འདས་པདྨ་སྤྱན་རས་གཟིགས་དབང་ཕྱུག་ལ་བསྟོད་པས་བསྟོད་པར་བྱའོ། །སྐྱོན་མེད་ཡོན་ཏན་གྱིས་མཛེས་པ། །རྒྱལ་བ་འོད་དཔག་མེད་ཀྱིས་བརྒྱན། །ཅོད་པན་བཀྲ་ཤིས་སྦྱིན་པ་པོ། །ཐུགས་རྗེའི་བདག་ཉིད་ ཁྱོད་ལ་འདུད།།པདྨ་མཆོག་གི་འོད་ཀྱི་ལུས། །པདྨ་མཆོག་གིས་འཛིན་པ་དང་། །པདྨའི་དཔལ་གྱི་གཏེར་གྱི་ཕྱག་།པདྨ་ཆེན་པོའི་གདན་ལ་བཞུགས། །རལ་པའི་དཀྱིལ་འཁོར་དམ་པ་འཆང་། །ཐམས་ཅད་མཁྱེན་པའི་འབྱུང་གནས་འཛིན། །སེམས་ཅན་འདོན་པར་ བྱེད་ལ་མཁས།།སེམས་ཅན་དབུགས་འབྱིན་མཛད་པའི་ཕྱག་།དམན་དང་གཞན་ལ་རྗེས་བརྩེ་བ། །སེམས་ཅན་སྨིན་པར་མཛད་པ་ལ། །རྟག་ཏུ་སེམས་ཅན་དེས་གནས་པ། །སེམས་དཔའ་ཆེན་པོ་བསྟོད་པའི་བདག་།སེམས་དཔའི་སྙིང་པོ་མཆོད་པ་ལ། །རྒྱུ་ མེད་སེམས་ཅན་མཉེས་གཤིན་པ།།སྨན་གྱི་རྒྱལ་པོ་དང་མཚུངས་པ། །ཉི་མ་ཟླ་བ་མེ་ཡི་སྤྱན། །ཤིན་ཏུ་རྣམ་པར་དག་ཡོན་བདག་།ཤིན་ཏུ་རྣམ་དག་གོ་འཕང་གནས། །ཤིན་ཏུ་རྣམ་དག་རབ་སྦྱིན་པ། །དམ་ཆོས་མཛོད་ཀྱི་བདག་པོ་སྟེ། །ཡིད་བཞིན་ནོར་བུ་མཉམ་ པའི་འོད།།ཐར་པའི་ལམ་ལ་རབ་གནས་པ། །སྣ་ཚོགས་འཇིགས་པ་འཕྲོག་པར་བྱེད། །ཡོན་ཏན་མགོན་པོ་ཁྱོད་ལ་བསྟོད། །ཐུགས་རྗེ་ཆེན་པོ་ཁྱོད་ལ་འདུད། །བྱམས་དང་དགའ་བ་ལ་ཕྱག་འཚལ། །ཕ་རོལ་ཕྱིན་པ་དྲུག་ཕྱག་འཚལ། །ཁྱབ་བདག་ཆེན་ པོ་ཁྱོད་ཞབས་ལ།།ས་ལ་ལྷུང་ནས་བདག་ཕྱག་འཚལ། །ས་སྟེངས་འཇིག་རྟེན་དག་བྱས་པ། །ཉེས་པ་ཟད་པར་མཛད་པ་ལ། །ཇི་ལྟར་མཁའ་ནི་ཕ་རོལ་མཐའ་མེད་ཅིང་། །ཉི་མའི་རབ་གདུང་མཚུངས་མེད་ཇི་བཞིན་ཉིད། །ཇི་ལྟར་སངས་རྒྱས་ཡོན་ཏན་མཐའ་མེད་ཉིད། ། ཁྱེད་ཀྱི་བརྩེ་ཆེན་མཐའ་མེད་དེ་བཞིན་ཉིད། །ནམ་མཁའ་མ་ལུས་ཀུན་དུ་གནས། །རྟག་ཏུ་འགྲོ་དྲུག་རྒྱུ་བྱེད་པ། །ཀུན་ནས་འདོན་པ་བྱེད་འདོད་ཁྱོད། །སྲིད་པའི་བར་དུ་བདག་ཕྱག་འཚལ། །འཇིག་རྟེན་བླ་མ་འཕགས་པ་ཁྱོད་ཞབས་པདྨ་ལ། །བདག་གིས་བསྟོད་པའི་བྱ་བ འདི་དག་ཀུན་ཕུལ་ལས།།ཡང་དག་བྱུང་བའི་བསོད་ནམས་མངོན་བྱུང་ཉེར་ཐོབ་པ། །སྐྱེ་བོ་རྣམས་ཀྱིས་རྟག་པ་ཁོ་ནར་འབྱུང་བར་གྱིས། །ལོང་བ་མགོན་མེད་ལམ་མེད་རབ་ཞུགས་པ། །སྲིད་པའི་སྡིག་པའི་ཚོགས་སུ་ངེས་བྱིན་ལུས། །བསོད་ནམས་འདི་ཡིས་ཉེས་པ་མ་ལུས་ པར།།སླར་ནི་མི་སྐྱེ་མྱུར་དུ་གྲོལ་གྱུར་ཅིག་།སྡུག་བསྔལ་རྣམ་པར་སྤངས་ཤིང་མུན་པའི་ཚོགས་བསལ་བ། །ཆགས་པ་ཉེ་བའི་ཆགས་བྲལ་འཁོད་པའི་རྒྱུ་ཚོགས་ཀྱིས། །འཁོར་བ་རྒྱུ་བ་པོར་རྒྱུར་ཡུལ་སྤྲུལ་མཆེ་བ་ཡི། །ཕྲག་ཏུ་ཉེར་སོན་ཉེན་པ་བདག་ལའང་རབ་སྲུངས་ ཤིག་།དམ་པའི་ལམ་སྟོན་མཆོག་ཏུ་ཆེ་བའི་དོན་བཅས་འཛིན། །མཆོག་གི་དབང་ཕྱུག་དང་ནི་མྱུར་དུ་ལམ་སྟོན་ཅིག་།ལས་ཀྱི་ཆུ་རླབས་གཡོ་བའི་དྲག་པོའི་ཡུལ་འཛིན་པ། །འཇིགས་པའི་དབང་པོ་རབ་དྲག་ཆུ་སྲིན་འཇིགས་རུང་མཚན། །འཁོར་བའི་རྒྱ་མཚོ་སྒྲོལ བྱེད་སྐྱ་འཛིན་བཅོམ་ལྡན་འདས།།སྙིང་རྗེའི་གཏེར་གྱིས་མྱུར་དུ་ཕ་རོལ་བདག་དྲོངས་ཤིག་།འཇིག་རྟེན་ཁམས་ཀྱི་ལྷ་དབང་པདྨ་སྤྱན་རས་གཟིགས། །སེམས་ཅན་མ་ལུས་སྲིད་པའི་སྡུག་བསྔལ་ཚོགས་རྣམས་འཕྲོག་།བདག་དང་འགྲོ་ཀུན་འཇིགས་འཕྲོག་བདག་ཉིད་ཆེན་པོ་ ཁྱོད།།རྟག་ཏུ་མི་འབྲལ་མཐོང་བར་འདིར་ནི་ཡོད་གྱུར་ཅིག་།སྐྱོ་དང་ཉེར་ཆགས་སྤངས་པ་མཚུངས་མེད་དྲི་བྲལ་བརྩོན་འགྲུས་ལྡན། །གཞན་ཕན་ངེས་དགའ་བདག་ནི་ངེས་པ་བདག་ལ་དོགས་པ་མེད། །རྒྱ་ཆེ་ཡོན་ཏན་རྟག་ཏུ་ཕྱུག་པ་ཉེས་པ་རབ་རྒྱས་གྲོལ། །རབ་མཆོག་པདྨའི་ཕྱག་ ཁྱོད་ཇི་བཞིན་ཁོ་ནར་བདག་གྱུར་ཅིག་།ཅེས་བསྟོད་པ་བྱའོ། །དེ་ནས་བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཏེ་ཚངས་པའི་གནས་བཞི་བསྒོམ་པར་བྱའོ། །དེ་ལྟར་བསྒོམ་པར་བྱས་ལ་བདག་ཉིད་སྔགས་ཀྱི་དཀྱིལ་འཁོར་བསྲུང་བའི་དོན་དུ་སྡིགས་མཛུབ་དང་མཐེ་བོའི་སེ གོལ་རྣམས་ཀྱིས་ཤར་ལ་སོགས་པའི་ཕྱོགས་དང་ཕྱོགས་བྲལ་རྣམས་སུ་བགེགས་བསྐྲད་པར་བྱ་སྟེ།ོཾ་ཨ་མྲྀ་ཏ་ཀུཎྜ་ལི་ཧ་ན་ཧ་ན་ཧཱུཾ་ཕཊ་ཅེས་པའི་སྔགས་ཀྱིས་སོ། །དེ་ནས་རང་གི་སྙིང་གར་པཾ་ལས་སྐྱེས་པའི་པདྨ་དམར་པོ་དེའི་སྟེང་དུ་ཟླ་བའི་དཀྱིལ་འཁོར་དེའི་སྟེང་དུ་ཧྲཱིཿཡིག་ཁ་དོག་ དཀར་པོ་བསམས་ནས་ནམ་མཁར་སངས་རྒྱས་དང་བྱང་ཆུབ་སེམས་དཔའ་ཉན་ཐོས་ཀྱི་དགེ་འདུན་དང་བཅས་པ་ཐམས་ཅད་སྣང་བར་གྱུར་པར་རྣམ་པར་བསམ་པར་བྱའོ།།རང་གི་འདོད་པའི་ལྷའི་གཟུགས་རྣམས་དཀྱིལ་འཁོར་གྱི་འཁོར་ལོ་བླ་མ་རྣམས་དང་བཅས་པ་སྣང་བར་གྱུར་པར་བྱའོ། ། ཨོཾ་སརྦ་ཏ་ཐཱ་ག་ཏ་ཨཱ་ད་ཡ་སཾ་སྲ་བ་ཀ་པྲ་ཏྱེ་ཀ་བུདྡྷ་བོ་དྷི་སཏྭ་ཨཱཏྨ་ཀཾ་ཨ་ནུ་གྲ་ཧཱ་ཡ་ག་ག་ན་ཏ་ལེ་ཨཱ་བི་ར་བྷཱ་བནྟུ་ཧཱུཾ་ཧཱུཾ་ཧཱུཾ་ཡུཥྨ་བྷྱཾ་ན་མཿསྭཱ་ཧཱ། ཞེས་པ་སྣང་བར་གྱུར་པའི་སྔགས་སོ། །སླར་ཡང་ཧྲཱིཿཡིག་དེ་ལས་གཟུགས་དང་སྒྲ་དང་དྲི་དང་རོ་དང་རེག་བྱ་རྡོ་རྗེ་མའི་ལྷ་མོ་རྣམས་དང་ཕྱི་རོལ་གྱི་རྣམ པ་སྣ་ཚོགས་པའི་མེ་ཏོག་ལ་སོགས་པའི་ལྷ་མོ་རྣམས་ཀུན་དུ་སྤྲོས་ནས་དེ་ཉིད་ཡང་དག་པར་མཆོད་དེ་བདག་དེ་རྣམས་ལ་དབུལ་བར་བྱས་ནས་ཐལ་མོ་སྦྱར་ཏེ་ཕྱག་དང་བཅས་པར་བྱའོ།།དེ་བཞིན་དུ་སྔགས་ཀྱང་བཀླག་པར་བྱའོ། །ོཾ་སརྦ་ཏ་ཐཱ་ག་ཏ་པུཥྤ་པཱུ་ཛ་མེ་གྷ་ས་མུ་དྲ་སྥ་ར་ཎ་ས་མ་ཡ་ ཤྲི་ཡཾ་ཧཱུཾ།དེ་བཞིན་དུ་དྷཱུ་བ་ལ་སོགས་པ་རྣམས་སོ། །འདི་ལྟར་ནམ་མཁར་སྣང་བར་གྱུར་པའི་དཀྱིལ་འཁོར་མཆོད་པར་བྱའོ། །དེ་ནས་སྡིག་པ་བཤགས་པ་སྔོན་དུ་འགྲོ་བས་དཀོན་མཆོག་གསུམ་ལ་སྐྱབས་སུ་འགྲོ་བའི་ཚིགས་སུ་བཅད་པ་བཀླག་པར་བྱའོ། །སངས་རྒྱས་ བླ་མ་ཕྱག་འཚལ་ལོ།།སྐྱོབ་པའི་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་ལའང་རྟག་ཏུ་ཕྱག་འཚལ་ལོ། །དཀོན་མཆོག་གསུམ་ལ་བདག་སྐྱབས་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་ རྗེས་ཡི་རང་།།སངས་རྒྱས་བྱང་ཆུབ་ཡིད་ཀྱིས་གཟུང་། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་བར་དུ་བདག་སྐྱབས་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། །བྱང་ཆུབ་མཆོག་གི་སེམས་ནི་བསྐྱེད་བགྱིས་ཤོག་། སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འབྱུང་གྱུར་ཅིག་།སྡིག་པ་ཐམས་ཅད་བཤགས་པ་དང་། །བསོད་ནམས་རྗེས་སུ་ཡི་རང་དང་། །གང་འཕགས་ཡན་ལག་བརྒྱད་གསོ་སྦྱོང་། ། བྱས་སམ་ཀུན་དུ་སྤྱད་པར་བགྱིའོ། །ཞེས་སོ། །དེ་ནས་སླར་ཡང་ཚངས་པའི་གནས་བཞི་བསྒོམ་པར་བྱས་ནས་དོན་དམ་པ་ལས་ཆོས་ཐམས་ཅད་བདག་མེད་པ་འདུས་བྱས་ཐམས་ཅད་སྐད་ཅིག་པ་མྱ་ངན་ལས་འདས་པ་ཞི་བའོ་ཞེས་ཁམས་གསུམ་པ་སེམས་ཙམ་ཁོ་ནའོ་ཞེས་སྔགས་ཀྱི་དོན བསྒོམ་པར་བྱའོ།།ོཾ་སྭ་བྷཱ་བ་ཤུདྡྷཿསརྦ་དྷརྨཱཿསྭ་བྷཱ་བ་ཤུདྡྷོུ྅ཧཾ། ཨོཾ་སྭ་བྷཱ་བ་ཤཱུ་ནྱེཿསརྦ་དྷརྨཱཿསྭ་བྷཱ་བ་ཤཱུ་ནྱོུ྅ཧཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོུ྅ཧཾ། ཞེས་སོ། །དེ་ནས་ནང་གི་མི་ཤེས་པའི་མུན་པ་ཡོངས་སུ་བསྐོར་བའི་སྙིང་གའི་ཁུང་བུའི་ནང་དུ་སོན་པ་སེམས་ལ་གན ས་པ་རྣམ་པར་བསམས་ནས།དེའི་མུན་པའི་རྣམ་པའི་རང་གི་ངོ་བོ་མི་ཤེས་པ་བཟློག་པའི་ཕྱིར་སྙིང་གི་པདྨ་རབ་ཏུ་རྒྱས་པ་ལ་བརྒྱ་ཕྲག་བཅུར་འོད་གསལ་བའི་ཉི་མ་ལ་སོགས་པ་རྣམ་པར་བསྒོམ་པར་བྱའོ། །དེས་སེམས་དྲི་མ་མེད་པ་ཅན་དུ་བྱས་པ་ཀུན་དུ་བལྟ་བར་བྱའོ། ། དེ་ལ་སེམས་ཀྱི་ནང་དུ་ཧཱུཾ་ཡོངས་སུ་གྱུར་པ་འཆད་བཞིན་པའི་རིམ་པས་རྡོ་རྗེའི་གུར་ལ་སོགས་པའི་རིམ་པའོ། །དཔེར་ན་དང་པོར་རེ་ཞིག་ཆོས་འབྱུང་གི་ཕྱག་རྒྱ་གདེངས་ཀ་གྱེན་དུ་ཕྱོགས་པ་དཀར་པོ་ཟུར་གསུམ་འོག་ཏུ་རྩེ་མོ་ཕྱོགས་པ་བསྒོམ་པར་བྱའོ། །དེའི་དབུས་སུ་སྣ་ཚོགས་པདྨ དང་སྣ་ཚོགས་རྡོ་རྗེའོ།།དེའི་འོག་ཏུ་ཡཾ་ལས་སྐྱེས་པའི་རླུང་གི་དཀྱིལ་འཁོར་ནག་པོར་སྣང་བའོ། །དེའི་སྟེང་དུ་རཾ་ལས་སྐྱེས་པའི་དཀྱིལ་འཁོར་དམར་པོ་ཟུར་གསུམ་པ། དེའི་སྟེང་དུ་བཾ་ལས་སྐྱེས་པའི་ཆུའི་དཀྱིལ་འཁོར་དཀར་པོ་ཟླུམ་པོ། དེའི་སྟེང་དུ་ལཾ་ལས་སྐྱེས་པའི་དབང་ཆེན་གྱི་དཀྱིལ་ འཁོར་སེར་པོ་གྲུ་བཞི།དེའི་སྟེང་དུ་སུཾ་ལས་སྐྱེས་པའི་ལྷུན་པོ་ཆོས་མངོན་པ་མཛོད་ཀྱིས་འཇིག་རྟེན་གྱི་ཁམས་མཉམ་པར་གཞག་པར་གསུངས་པ་བཞིན་རི་བདུན་དང་གླིང་དང་བཅས་པ་དེའི་སྟེང་དུ་ཨ་ཡོངས་སུ་གྱུར་པའི་ཟླ་བ། དེའི་སྟེང་དུ་པཾ་ཡིག་སེར་པོ་ཡོངས་སུ་གྱུར་པ་ལས་སྣ་ ཚོགས་པདྨ།དེའི་སྟེང་དུ་བཾ་ཡོངས་སུ་གྱུར་པའི་སྣ་ཚོགས་རྡོ་རྗེའོ། །དེའི་ལྟེ་བ་ལ་བྷཱུཾ་ལས་སྐྱེས་པའི་འཁོར་ལོ། དེའི་ལྟེ་བར་རྣམ་པར་སྣང་མཛད་ཀྱི་རང་གི་ངོ་བོ་ཡེ་ཤེས་ཀྱི་མཆོད་རྟེན་ཁང་པ་བརྩེགས་པ་བལྟ་བར་བྱའོ་ཞེས་པ་རྒྱུད་ཐམས་ཅད་ལ་ངེས་པའོ། །ཁང་པ་བརྩེགས་པ་ དེ་ཉིད་ལ་གྲུ་བཞི་པ་སྒོ་བཞི་པ་ཞེས་དཀྱིལ་འཁོར་གྱི་ཆོ་གར་བྲིས་པ་འཆད་བཞིན་པའི་རིམ་པས་ཐམས་ཅད་རྣམ་པར་བསམས་པར་བྱས་ནས་དེའི་བདག་ཉིད་མཆོད་པའི་ཡོ་བྱད་དུ་གྱུར་པར་དབུལ་བར་བྱའོ།།ོཾ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོུ྅ཧཾ། ཞེས་སོ། །དེ་ནས་མགོ་བོར་འ ཁོར་ལོ་རྩིབས་བཅུ་གཉིས་པ་དཀར་པོའི་སྟེང་དུ་ཨོཾ་ཡིག་དཀར་པོ།ོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱཏྨ་ཀོུ྅ཧཾ། དེའི་རྗེས་སུ་མགྲིན་པར་པདྨ་དཀར་པོ་འདབ་མ་བརྒྱད་པ། དེའི་སྟེང་དུ་ཨཱཿདམར་པོ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་བ་ཨཱཏྨ་ཀོུ྅ཧཾ། དེའི་རྗེས་སུ་སྙིང་ག ར་རྡོ་རྗེ་ནག་པོའི་སྟེང་དུ་ཧཱུཾ་ཡིག་ནག་པོ།ོཾ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོུ྅ཧཾ། ཨོཾ་ཨཱཿཧཱུཾ། སརྦ་ཏ་ཐཱ་ག་ཏ་ཀཱ་ཡ་ཝཱཀ་ཙིཏྟ་བཛྲ་སྭ་བྷཱ་ཝ་ཨཱཏྨ་ཀོུ྅ཧཾ། ཞེས་བསམས་ནས། དེ་ནས་གཡས་སུ་ཞབས་བསིལ་དང་མཆོད་ཡོན་གྱི་སྣོད་མདུན་དུ་བཞག་ནས། ཨོཾ་བཛྲ་ཨར ྒྷཾ་ཨཱཿཧཱུཾ་ཞེས་ཉེ་བར་རེ་གནས་སྐུའི་དབང་པོ་ལ་སོགས་པའི་ས་བོན་གསུམ་གྱིས་བྱིན་གྱིས་བརླབ་པོ།།དེ་ནས་ཞབས་བསིལ་དེས་མཆོད་རྫས་གཞན་ལ་མངོན་པར་གཏོར་བར་བྱའོ། །ོཾ་ཨརྒྷཾ་པྲ་ཏཱིཙྪ་བཛྲ་པ་དྱཾ་པྲ་ཏཱིཙྪ་བཛྲ་པུཥྤེ་ཨཱཿཧཱུཾ། བཛྲ་དྷཱུ་པེ་ཨཱཿཧཱུཾ་ཞེས་པ་ལ་སོགས་པ་རང་རང་ གི་ཕྱག་རྒྱས་དབུལ་བར་བྱའོ།།དེ་ནས་རང་གི་དོན་གྱི་ཆོ་གས་བྲིས་པ་མ་ཡིན་པའི་དཀྱིལ་འཁོར་སྔར་གྱི་རིམ་པས་ཡེ་ཤེས་སེམས་དཔའ་བཀུག་ནས་རྡོ་རྗེ་ལྕགས་ཀྱུ་ལ་སོགས་པའི་རིམ་པས་ནང་དུ་གཞུག་པར་བྱའོ། །སླར་ཡང་ཀུན་ཏུ་སྤྲོས་ནས་སེམས་ཅན་ལ་ཕན་པའི་དོན་ བྱེད་དུ་བཅུག་ནས་དམ་ཚིག་གི་དཀྱིལ་འཁོར་དང་ཡེ་ཤེས་ཀྱི་དཀྱིལ་འཁོར་དག་གཅིག་ཉིད་དུ་བྱས་ནས་དཀྱིལ་འཁོར་དང་དཀྱིལ་འཁོར་པ་རྣམས་རང་རང་གི་སྙིང་པོའི་སྔགས་ཀྱིས་མཆོད་པར་བྱ་ཞིང་བཟླས་པ་དང་བསྟོད་པར་བྱས་ལ་མཐར་གཤེགས་སུ་གསོལ་བར་བྱའོ་ཞེས་པ་དཀྱིལ འཁོར་དང་བྲལ་བ་རང་གི་དོན་གྱི་ཆོ་གར་མདོར་བསྡུས་པ་ལས་རྒྱས་པས་གཞན་གྱི་དོན་དུ་དཀྱིལ་འཁོར་ལ་བརྗོད་པར་བྱའོ་ཞེས་པ་དང་པོར་སྦྱོར་བ་སྒྲུབ་པ་པོ་རང་གི་དོན་ཆོས་ཀྱི་སྐུའོ།།དེ་ནས་དཀྱིལ་འཁོར་རྒྱལ་པོ་མཆོག་གི་ཆོ་ག་རྒྱས་པས་དཀྱིལ་འཁོར་གྱི་ཆོ་ག་བརྗོད་པར་བྱའོ། །དེ་ལ་དང་པོར་རེ་ཞིག་ དཀྱིལ་འཁོར་གྱི་གནས་ཞིང་གི་བདག་པོ་ལ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱཏ་ཅེས་པས་གཏོར་མ་སྦྱིན་པར་བྱའོ།།དེ་ལ་དཀྱིལ་འཁོར་དུ་ཉེ་བར་རུང་བའི་ས་ལ་བ་ལས་བྱུང་བ་བཅུ་ཕྱེད་ཀྱིས་ཉེ་བར་བྱུག་པར་བྱའོ། །དེ་ལ་སྔགས་ནི་ཨོཾ་ས་མནྟ་དྷ་ར་ཤུདྡྷེ་དྷ་ར་དྷ་ར་ཧཱུཾ། ཨོཾ་ནི་རྨ་ལ་ཤུདྡྷ་ཧཱུཾ་ ཞེས་སོ།།དེ་ནས་ས་གཞི་དེ་ཁོ་ནའི་བགེགས་བཟློག་པའི་དོན་དུ་ཞི་བ་ཅན་གྱི་སྦྱིན་སྲེག་བྱའོ། །དེ་ལ་དཀྱིལ་འཁོར་དུ་ཉེ་བར་བྱས་ནས་གཡས་སུ་སྤོས་ཕོར་གཡོན་དུ་དྲིལ་བུ་བཟུང་ནས་ལྷ་སྤྱན་དྲང་བ་འདི་བཀླག་པར་བྱའོ། །ད་ནི་རྡོར་སེམས་རང་ངོ་བོ། །དཀྱིལ་འཁོར་མཆོག་ནི་འདྲི་བར་ བྱེད།།ལྷ་རྣམས་བདག་ལ་གྲུབ་པའི་ཕྱིར། །མྱུར་དུ་བསྙེན་པར་མཛད་དུ་གསོལ། །ཞེས་གསོལ་བ་གདབ་པར་བྱའོ། །དེ་ནས་སློབ་དཔོན་རྡོ་རྗེ་སེམས་དཔའི་རང་གི་གཟུགས་སུ་བསམས་ནས་གཡོན་པ་དྲིལ་བུ་ཐོགས་པ་གཡས་པ་ཁ་ཊྭཱཾ་ག་སྟེང་དུ་རྩེ་མོ་ལྔ་པའི་རྡོ་རྗེ་འཆང་བར་ བསམས་ནས་བདག་དེ་དང་འདྲ་བའི་ཕྱག་རྒྱ་བཅིངས་ནས་གཞན་སློབ་མ་རྣམས་ཤར་ལ་སོགས་པའི་ཕྱོགས་སུ་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་བཞིའི་ལུས་སུ་ཡོངས་སུ་བཞག་ནས་དེ་རྣམས་ཀྱིས་དཀྱིལ་འཁོར་གྱི་སའི་སྟེང་གི་བླ་མ་སྔགས་ཀྱིས་མཆོད པར་བྱའོ།།དེ་ནས་དེ་རྣམས་རྡོ་རྗེ་དྲིལ་བུ་གསིལ་ཞིང་ཤར་དུ་མཉམ་པའི་རྐང་སྟབས་དང་རྗེས་སུ་རྐང་པ་ལ་སོགས་པ་རྐང་སྟབས་བཞིས་གར་བྱས་ནས་རང་རང་གི་གནས་སུ་ཉེ་བར་འདུག་སྟེ་དེ་རྣམས་རྣམ་པར་སྣང་མཛད་ལ་སོགས་པ་རང་རང་གི་ཁ་དོག་དང་ཕྱག་རྒྱས་མཛད་པར་བཞག་ནས་ བླ་མ་རང་ཉིད་ཤར་དུ་མངོན་པར་ཕྱོགས་པ་ཇི་ལྟར་གནས་པ་དེ་བཞིན་ཁོ་ནར་འདུག་པར་བྱའོ།།དེ་ནས་སློབ་མ་དེ་རྣམས་རྡོ་རྗེ་སེམས་དཔའི་རང་གི་ངོ་བོ་བླ་མ་ལ་རྡོ་རྗེ་མེ་ཏོག་ལ་སོགས་པའི་མཆོད་པ་བཅུ་གསུམ་བྱའོ། །དེ་ལ་སྔགས་ནི། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་དྷཱུ་པེ་ཨཱཿཧཱུཾ། ཨོཾ་ བཛྲ་གནྡྷེ་ཨཱཿཧཱུཾ།ོཾ་བཛྲ་ནཻ་བེ་དྱ་ཨཱཿཧཱུཾ། ཨོཾ་བཛྲ་ཤབྡ་ཨཱཿཧཱུཾ། ཨོཾ་བཛྲ་ལཱ་སྱེ་ཨཱཿཧཱུཾ། ཨོཾ་བཛྲ་མཱ་ལེ་ཨཱཿཧཱུཾ། ཨོཾ་བཛྲ་གཱིརྟི་ཨཱཿཧཱུཾ། ཨོཾ་བཛྲ་ནརྀ་ཏྱེ་ཨཱཿཧཱུཾ། ཨོཾ་རཱ་ས་བཛྲ་ཨཱཿཧཱུཾ། ཨོཾ་སྤཪྴེ་ཛཱ་ཏེ་ཨཱཿཧཱུཾ། ཨོཾ་བཛྲ་ཨརྒྷཾ་ཨཱཿཧཱུཾ། ཞེས་པ་བཅུ་གསུམ་པོ་རང་རང་གི་ཕྱག་རྒྱ་ རྣམས་ཀྱིས་མཆོད་པར་བྱའོ།།དེ་ནས་ཨོཾ་བཛྲ་བྷཱུ་མི་ཨཱཿཧཱུཾ། ཨོཾ་བཛྲ་རེ་ཁེ་ཨཱཿཧཱུཾ། ཞེས་པས་ས་རྣམ་པར་སྦྱང་བར་བྱའོ། །དེ་ནས་ཡང་སློབ་མ་དེ་རྣམས་སླར་ཡང་རྐང་སྟབས་བཞིས་གར་བྱེད་པས་རྡོ་རྗེ་དྲིལ་བུ་བཟུང་ནས་ཨི་དཾ་ཏེ་གུ་རུ་མཎྜལ་ཀཾ་ནིརྱ་ཏ་ཡཱ་མི་ཞེས་པས་དབུལ་བར་ བྱའོ།།ཞེས་པ་སློབ་མ་བཞིས་རིམ་པས་སོ། །མེད་ན་སློབ་དཔོན་གཅིག་པུ་ཁོ་ནས་ཐམས་ཅད་བྱའོ། །དེ་ནས་རྡོ་རྗེ་སེམས་དཔའི་རང་གི་ངོ་བོ་བླ་མ་རྡོ་རྗེ་དྲིལ་བུ་དང་བཅས་པས་ཕྱག་དག་གིས་པདྨའི་བསྐོར་བས་གར་གྱི་རྣམ་པས་རྐང་སྟབས་བཞིས་རྗེས་སུཾ་རྐང་པ་ལ་སོགས་པས་ཡོངས་སུ་ བསྐོར་ནས།ོཾ་སརྦ་ཏ་ཐཱ་ག་ཏ་པཱ་ད་བནྡྷ་ནཾ་ཀ་རོ་མི། ཞེས་པས་རྡོ་རྗེ་གསོར་བར་བྱས་དྲིལ་བུ་གཡོན་དུ་ཁ་གྱེན་དུ་ཕྱོགས་པར་བྱས་ནས་གནས་པར་བྱའོ། །ཧཱུཾ་ཧཱུཾ་ཞེས་བརྗོད་ལ་བགེགས་བསྐྲད་པར་བྱའོ། །སླར་ཡང་རཀྵ་རཀྵ་ཧཱུཾ་ཞེས་བརྗོད་ནས་དབང་ལྡན་ལ་སོགས་པར་གཡོན་སྐོར་ གྱིས་བལྟ་བར་བྱའོ།།སླར་ཡང་དབང་ལྡན་ལ་སོགས་པར་གཡས་སྐོར་གྱིས་བལྟ་བར་བྱའོ། །དེ་ནས་རྡོ་རྗེའི་གུར་བསྒོམ་པར་བྱ་སྟེ་སྔགས་འདི་རྣམས་ཀྱིས་སོ། །ོཾ་བཛྲ་མེ་དི་ནཱི་བཛྲཱི་བྷ་བ་བནྡྷ་ཧཱུཾ་ཕཊ། ཨོཾ་བཛྲ་པཉྫ་ར་ཧཱུཾ་བཾ་ཧཱུཾ་ཕཊ། ཨོཾ་བཛྲ་པྲཱ་ཀཱ་ར་ཧཱུཾ་པཾ་ཧཱུཾ་ཕཊ། ཨོཾ་བཛྲ་ཤ་ ར་ཛཱ་ལ་ཏྲཱཾ་སཾ་ཏྲཱཾ་ཕཊ།ོཾ་བཛྲ་ཨ་ཙ་ན་གྲྀ་ཧེ་ཧཱུཾ་ཕཊ། ཨོཾ་བཛྲ་བི་དཱ་ན་ཧཱུཾ་བཾ་ཧཱུཾ་ཕཊ། ཨོཾ་བཛྲ་སུ་ཁ་ཨཱ་ས་ན་ཧཱུཾ་ཕཊ། ཅེས་པས་རྡོ་རྗེའི་གུར་བསྒོམ་པར་བྱའོ། །དེ་ནས་རྡོ་རྗེ་སེམས་དཔའི་དམ་ཚིག་གི་ཕྱག་རྒྱ་གུང་མོ་གཉིས་ས་ལ་གནས་པར་བྱས་ནས། ཨོཾ་བཛྲ་ ཨུཏྟིཥྛ་ཞེས་པས་ནམ་མཁར་བཏེག་ནས་དཀྱིལ་འཁོར་གདེག་པར་བྱའོ།།དེ་ནས་རྗེས་སུ་རྐང་པ་ལ་སོགས་པའི་རིམ་པ་བཞི་པོ་བྱས་ནས་རྐང་པ་བརྡབ་པར་བྱས་ཏེ། ཧཱུཾ་ཞེས་བརྗོད་པས་ཁྲོ་བོ་སྤྲོས་ནས། ཨོཾ་བཛྲོད་གྷ་ཊ་ཡ་ས་མ་ཡ་པྲ་བེ+ེ་ཤ་ཡ་ཧཱུཾ། རིམ་པས་སྒོ་བཞི་པོའི་སྒོ་ གླེགས་དབྱེ་བར་བྱའོ།།དེ་ནས་སྡིགས་མཛུབ་ཕུར་པའི་ཕྱག་རྒྱས་ཨོཾ་བཛྲ་མཎྜལ་ཧཱུཾ་ཛཿཞེས་བརྗོད་པས་ཡེ་ཤེས་ཀྱི་དཀྱིལ་འཁོར་དགུག་པར་བྱའོ། །དམ་ཚིག་དང་ཡེ་ཤེས་ཀྱི་དཀྱིལ་འཁོར་དག་གཅིག་ཏུ་བྱའོ། །དེ་ནས་སེང་ལྡེང་གི་ཕུར་པ་ལྔ་པོ་རྣམས་འབྲུ་ལྔ་རྣམས་ལ་བཞག་ ནས་ཨོཾ་ཞེས་བརྗོད་ནས་དེ་ནས་ཕྱུང་སྟེ་སོ་མ་བཏང་བའི་ཕ་གུ་རྣམས་དབང་ལྡན་ལ་སོགས་པ་རྣམས་སུ་ཡོངས་སུ་བཞག་ནས།ོཾ་བཛྲ་ཀཱི་ལི་ཀཱི་ལ་ཡ་སརྦ་བིགྷྣཱཾ་བནྡྷ་ཧཱུཾ་ཕཊ། ཅེས་བརྒྱད་ལྷག་པའི་བརྒྱ་ཡོངས་སུ་བཟླས་ནས་དབང་ལྡན་ལ་སོགས་པའི་ཕྱོགས་རྣམས་སུ་ཕུར་བུས་གདབ་ པོ།།ོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦ་དུཥྚཱན་ཀཱི་ལ་ཡ་ཀཱི་ལ་ཡ། སརྦ་པཱ་པཾ་བིགྷྣཱཾ་བཛྲ་ཀཱི་ལ་ཡ་བཛྲ་དྷ་ར་ཨཱཛྙཱ་པ་ཡ་ཏི་སྭཱ་ཧཱ། ཞེས་བརྗོད་ནས་རྡོ་རྗེ་ཐོ་བས་ཕུར་བུས་གདབ་པར་བྱའོ། །དཀྱིལ་འཁོར་གྱི་སྙིང་པོར་རྐོ་བར་བྱེད་པ་འཇིགས་པའི་ཕྱིར་ཤར་སྒོར་ཕུར་བུས་གདབ་པོ། ། འདིས་བགེགས་རྣམས་ཕུར་བུས་གདབ་པོ་ཞེས་པའི་དོན་ཏོ། །དེ་ནས་བདུད་རྩི་འཁྱིལ་པའི་སྔགས་ཀྱིས་བུམ་པ་དཀར་པོ་བྱས་ནས་སྣམ་བུ་དམར་པོས་དཀྲིས་ཏེ་འབྲུ་ལྔ་ལ་སོགས་པ་དང་བཅས་པ་མཆོད་ཡོན་དང་བཅས་ཤིང་མཚན་མ་དང་བཅས་པར་བྱས་ནས། དེའི་སྟེང་དུ་པདྨ། པདྨའི་སྟེང་དུ་ཟླ་བའམ་ཉི་མ། དེའི་སྟེང་དུ་པདྨ་ལྕགས་ཀྱུའམ་བགེགས་མཐར་བྱེད་དམ་བདུད་རྩི་འཁྱིལ་པ་བསམས་ནས་དེའི་དབུས་སུ་རྡོ་རྗེ་ལྕགས་ཀྱུའི་རིམ་པས་ཡེ་ཤེས་པ་བཅུག་ནས་ཁ་བཤལ་བའི་དོན་དང་དག་པའི་དོན་དུ་དཀྱིལ་འཁོར་གྱི་ཁང་པའམ་སྒོའི་གཡོན་དུ་གཞག པར་བྱའོ།།གཞན་དུ་སློབ་དཔོན་རང་ངམ་སློབ་མས་ལག་པ་གཅིག་པོ་ཞི་བ་ཅན་གྱི་སྦྱིན་སྲེག་མདོར་བསྡུས་པའི་ཆོ་ག་བྱེད་དུ་གཞུག་གོ། །དེ་ལ་དཀྱིལ་འཁོར་གྱི་ཁང་པར་དབང་པོ་ལ་སོགས་པ་འཇིག་རྟེན་སྐྱོང་བ་བཅུའི་ལྷ་དང་ལྷ་མ་ཡིན་ལ་སོགས་པ་རྣམས་དང་། ཡི་དགས་ལ་སོགས་པ་དང་། ཀླུ་རྣམས་ཀྱི་གཏོར་མ་གསུམ་གྱི་སྣོད་གསུམ་སྦྱིན་པར་དེ་ལ་རིམ་པ་ནི། ལོ་ཏོག་ནས། གྲོ། སོ་བ། འབྲས། མ་ཤ་།མོན་སྲན་སྡེའུ། སྲན་ཆེན་ཨོ་སྐྱ་ཀ། སྲན་ཆུང་མ་སྡུ་ར་བདུན་དང་། ཆང་དང་ཤ་དང་ཉ་ལ་སོགས་པ་བླངས་ནས་སྣོད་གསུམ་པོ་རྣམས་སུ་བགོས་ནས བཅུག་སྟེ་བྱིན་གྱིས་བརླབ་པར་བྱས་ནས་སྔགས་ཀྱིས་ཀྱང་བྱིན་གྱིས་བརླབ་པར་བྱའོ།།ོཾ་ཨིནྡྲཱ་ཡ། ཨགྣ་ཡེ། ཡ་མ་ཡེ། ནཻརྼ;ྀ་ཏི་ཡེ། བ་རུ་ཎཱ་ཡ། བཱ་ཡ་བེ། ཀུ་བེ+ེ་རཱ་ཡ། ཨཱི་ཤྭ་ནཱ་ཡ། ཨུརྡྷཾ་བྲཧྨ་ཎི། ཙནྡྲ་སཱུརྱ་བྷྱཾཿ་ཨརྠཿཔྲྀ་ཐི་བྱཻ་སྭཱ་ཧཱ། ནཱ་གེ་བྷྱཿ་ ཨ་སུ་རེ་བྷྱཿ།དེ་བ་ཡཀྵ། གནྡྷརྦ། ཨ་སུ་ར། ག་རུ་ཌ། ཀིནྣ་ར། མ་ཧོ་ར་ག་།མ་ནུ་ཥྱ། ཨ་མ་ནུ་ཥྱ་བྷྱཿ། ས་པ་རི་བཱ་རེ་བྷྱ་སྭཱ་ཧཱ། ཨོཾ་གུཾ་གུཾ་སྭཱ་ཧཱ། ཨོཾ་གུཾ་ཀ་རེ་གུཾ་ཀ་རེ་སྭཱ་ཧཱ། བགེགས་བཟློག་པའི་དོན་དུ་གཏོར་མ་སྦྱིན་པར་བྱའོ། །ོཾ་ཚངས་སོགས་ལྷ་མིན་ ཐམས་ཅད་དང་།།དབང་སོགས་འཇིག་རྟེན་སྲུང་བ་པོ། །ཀླུ་དང་དྲི་ཟ་གནོད་སྦྱིན་རྣམས། །གཏོར་མ་འདི་ཡིས་ཚིམ་གྱུར་ཅིག་།ཅེས་སོ། །ོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱ་ཨཱདྱ་ནུདྤནྣ་ཏྭཱཏ། ཅེས་དང་མཆོད་ཡོན་དང་མེ་ཏོག་ལ་སོགས་པ་སྦྱིན་ནས། ཨོཾ་བཛྲ་མུཿཞེས་ བཀླགས་ནས་རོལ་མོའི་སྒྲས་གཤེགས་སུ་གསོལ་ཏེ་ཕྱོགས་ཀྱི་གཏོར་མའོ།།དེ་ནས་སློབ་དཔོན་ཞལ་བསིལ་གྱི་བུམ་པས་ཁ་བཤལ་ནས་གདོང་བཀྲུས་ཏེ་ཉེ་བར་འདུག་ལ། བསྟོད་པ་ལ་སོགས་བཀླག་པར་བྱའོ། །སྔ་མ་བཞིན་དུ་རང་ངམ་གཞན་གྱི་གཏོར་མའི་ལས་ལག་པ་ གཉིས་ཀྱིས་བྱས་ནས་མི་སྨྲ་བར་འདུག་པར་བྱའོ།།དེ་ནས་དབང་བསྐུར་བར་གསོལ་བ་འདེབས་བཞིན་པ་མཚན་ཉི་ཤུ་རྩ་ལྔ་དང་ལྡན་པ་ཡོངས་སུ་བརྟགས་ནས་དགུག་པར་བྱའོ། །སློབ་མ་འོངས་ནས་བླ་མ་ལ་ཕྱག་འཚལ་ཏེ་མེ་ཏོག་ཐལ་མོས་བཟུང་ནས། ཨོཾ་བཛྲ་བྷཱུ་མི་ཨཱཿ། ཨོཾ་བཛྲ་རེ་ཁེ་ཨཱཿཞེས་པས་ས་གཞི་ངེས་པར་བརྟག་པར་བྱས་ལ། དཀྱིལ་འཁོར་མཆོད་པ་དང་བླ་མ་ལ་བསྟོད་དེ་དབང་བསྐུར་བའི་དོན་དུ་གསོལ་བ་གདབ་པར་བྱའོ། །དེ་ལ་ཚིགས་སུ་བཅད་པའི། གང་གི་འོད་ཟེར་འཕྲོས་པའི་དྲིན་གྱིས་བདག་ཉིད་ཀྱི། །མུན པ་རབ་བཅོམ་དེ་ཉིད་རིན་ཆེན་གསལ་མཛད་པ།།རང་ཉིད་རྣམ་རྒྱལ་མཐོན་པོས་མཚུངས་མེད་རྙོག་བྲལ་གཟིགས། །དེ་ཕྱིར་གསལ་མཛད་བླ་མ་འདི་ལ་ཕྱག་བྱེད་དོ། །ཞེས་བརྗོད་དོ། །བླ་མ་དེའི་ལྷ་ལྷག་པར་གནས་པར་བྱ་སྟེ་དེ་ཁོ་ནའོ། །ོཾ་བཛྲ་གནྡྷེ། བཛྲ་པུཥྤེ། བཛྲ་ དྷཱུ་པེ།བཛྲ་ཨཱ་ལོ་ཀེ་ཞེས་བཀླགས་ནས་སྙིང་གར་དྲི་དང་། ཁ་ལ་བདུག་པ་དང་། ལག་པ་གཡོན་དུ་མེ་ཏོག་དང་། མིག་དག་ལ་མར་མེ་སྦྱིན་པར་བྱའོ། །དེ་ནས་ཨ་ཤྭཏྠ་འམ། ཨུ་དུམ+Wཱ་རའི་སོ་ཤིང་སོར་བཅུ་གཉིས་པ་རྩེ་མོར་མེ་ཏོག་དང་བཅས་པ་སློབ་མ་ལ་སྦྱིན་པར་བྱའོ། ། དེ་སློབ་མ་དེས་སོས་ཀུན་ནས་རེག་ནས་བ་ལང་གི་ཀོ་བ་ཙམ་ཉེ་བར་བྱུགས་པའི་ས་ལ་དོར་བར་བྱའོ། །ལྷུང་བའི་དགེ་བ་དང་མི་དགེ་བ་རྣམ་པར་དཔྱད་པར་བྱས་ནས་རྡོ་རྗེ་བཞིན་དུ་ལྷུང་བ་ལས་དངོས་གྲུབ་པོ་ཞེས་རྒྱུད་ཐམས་ཅད་ནས་བཤད་པའི་ལུགས་སོ། །ོཾ་པདྨ་ནེ་ཏྲོ་ཧྲཱིཿཞེས་པ སོ་ཤིང་དོར་བའི་སྔགས་སོ།།དེ་ནས་གཡས་སུ་ཉི་ཤུ་རྩ་གཅིག་པའི་ཀུ་ཤའི་རྩེ་མོ་བཟུང་ནས་གཡོན་དུ་བཅུ་གཉིས་པ་བཟུང་སྟེ། ཨོཾ་པདྨ་བཛྲི་ཎི་ཧྲཱིཿཞེས་པས་གློ་གཉིས་སུ་བྱིན་པར་བྱའོ། །དེ་ནས་རང་གི་ལག་པ་གཉིས་སུ་ཚད་ཀྱི་སྐུད་པ་བ་སྒྲིལ་བ་བཀུག་ནས་སུམ་སྒྲིལ་དུ་ བྱས་ནས་རྡོ་རྗེའི་མདུད་པ་བྱིན་ཏེ།ོཾ་པདྨ་ཨཾ་ཀུ་ཤ་ཧཱུཾ་ཕཊ་ཅེས་མངོན་པར་བསྔགས་ནས་ལག་པ་དག་ལ་བཅིང་བར་བྱའོ། །གསེར་དང་བཅས་པའི་རིལ་བུ་ཡང་ངོ་། །བཅིངས་པའི་བར་མ་ཆད་པར་བགེགས་མཐར་བྱེད་ཀྱི་སྔགས་ཀྱིས་བསྲུང་བར་བྱའོ། །བུདྡྷ་མཻ་ཏྲི་བཛྲ་ སྔོན་མའོ་ཞེས་པའི་སྔགས་ཀྱིས་སེ་གོལ་སྦྱིན་པར་བྱའོ།།ོཾ་བཛྲ་ཨུཥྞཱི་ཥ་ཞེས་པས་སློབ་མའི་གཙུག་ཏོར་བཅིང་བར་བྱའོ། །སང་ཆོས་སྟོན་པར་འགྱུར་རོ་ཞེས་སློབ་མ་གཉིད་ལོག་ཏུ་གཞུག་པར་བྱའོ། །དགེ་བ་དང་མི་དགེ་བའི་རྨི་ལམ་བརྗོད་དོ་ཞེས་པ་དང་བཤད་ པར་བྱའོ།།དེ་ནས་སློབ་དཔོན་རྡོ་རྗེ་དྲིལ་བུ་བཟུང་ནས་གསིལ་ཞིང་། རྡོ་རྗེའི་སྟེང་དུ་བདུག་སྤོས་བཟུང་ནས་སུ། །ཆོ་ག་ཇི་བཞིན་རིམ་ཇི་བཞིན། །སང་ནི་དཀྱིལ་འཁོར་བྲི་བར་བགྱི། །ལྷ་རྣམས་ལྷ་མོ་མཉམ་པར་བཅས། །ཉེ་བར་གནས་པར་མཛད་པར་རིགས། །ོཾ་ སརྦ་ཏ་ཐཱ་ག་ཏཱ་ནཾ།པཱ་ད་བནྡྷ་ནཾ་ཀ་རོ་མི། ཞེས་པས་ཕྱག་བྱས། སྔར་བརྗོད་པའི་བཅོམ་ལྡན་འདས་ལ་བསྟོད་པ་བཀླགས་ནས་མཆོད་ཡོན་ལ་སོགས་པ་ཕུལ་ཏེ། ལྷ་དང་རང་གི་མིང་སྙིང་པོར་བྱས་པས་རོལ་མོའི་སྒྲ་བསྒྲགས་ནས་གཏོར་མ་བྱིན་ཏེ། བཛྲ་མུཿཞེས་བཀླགས་ ནས་དབང་ལྡན་གྱི་ཟུར་གྱི་ཆ་གཅིག་ཏུ་བླ་མ་རང་ཡང་ཉལ་བར་བྱའོ།།ཐོ་རངས་ལངས་ནས་སྔར་བཞིན་དུ་གཙང་སྦྲ་ལ་སོགས་པ་བྱས་ཏེ། སློབ་མ་རྣམས་ཀྱིས་དགེ་བ་དང་མི་དགེ་བའི་རྨི་ལམ་བསྟན་ཏེ་མི་དགེ་བ་རྣམས་ལ་བགེགས་ལ་སོགས་པ་བསྲུང་བ་དང་། ཞི་བའི་མེ་ལ་སོགས་པ་ བྱས་ནས་བསྲུང་བར་བྱའོ།།དེ་ནས་དཀྱིལ་འཁོར་བྲི་བའི་ཆོ་ག་བརྗོད་པར་བྱའོ། །དེ་ལ་མཆོག་དཔག་ཚད་ཀྱི་གྲངས་སོ། །འབྲིང་རྒྱང་གྲགས་ཏེ། ཆུང་ངུ་ནི་ཀུན་དུ་ཁྲུ་ཡིས་སོ། །དེ་ལ་ཡང་ཁྲུ་བརྒྱ་ཡིས་འཁོར་ལོས་སྒྱུར་བས་སོ། །སའི་བདག་པོས་དེའི་ཕྱེད་ཀྱིས་སོ། ། བློན་པོ་ཆེན་པོས་ནི་དེའི་ཕྱེད་དོ། །སློབ་མ་དབང་བསྐུར་བ་ལ་དེའི་ཕྱེད་དོ། །སློབ་དཔོན་རང་གི་འདོད་པའི་ལྷ་མཉེས་པའི་དོན་དུ་དཀྱིལ་འཁོར་གྱི་ཚད་བྱའོ། །དེའི་ཚད་ཙམ་མེད་པ་ལས་ཐམས་ཅད་པ་ལ་ཁྲུ་བཞིའོ། །དེ་ལ་བཅོམ་ལྡན་འདས་དཔལ་པདྨ་སྤྱན་རས་གཟིགས དབང་ཕྱུག་གི་དཀྱིལ་འཁོར་འདི་ལ་ཁྲུ་བཞི་པ་ལ་སོགས་པའི་རིམ་པ་ཇི་ལྟ་བར་ཁྲུ་བཞིར་ཐམས་ཅད་ཁྲུ་བཅུ་དྲུག་པའོ།།དེ་ལ་སྙིང་པོ་ནས་ཕྱོགས་རྣམས་སུ་ཁྲུ་གཉིས་པར་འགྱུར་རོ། །དེའི་ཁྲུ་གཉིས་པོ་ནི་ཆ་གཉིས་སུ་བྱས་ནས་དེའི་ནང་མའི་ཆ་གཅིག་ལ་ཡང་ཆ་གསུམ་གྱིས་པདྨ་རིམ་པ་ གསུམ་མོ།།ནང་དུ་འདབ་མ་བརྒྱད་པའོ། །དེའི་སུམ་ཆས་ཟེའུ་འབྲུའོ། །ཕྱི་རོལ་དུ་འདབ་མ་བཅུ་གཉིས། དེའི་ཕྱི་རོལ་དུ་འདབ་མ་བཅུ་དྲུག་གོ་ཞེས་པ་སྡོང་བུ་གཅིག་ལ་རིམ་པ་གསུམ་མོ། །ཆ་གཉིས་པའི་དང་པོ་ལ་བྱང་ཆུབ་སེམས་དཔའི་སྣམ་བུའོ། །བར་མ་ལ་ རི་མོ་ལྔ་ཕྲ་མོའོ།།ཕྱི་མ་ལ་རི་མོ་ལྔ་སྦོམ་པོའོ། །རི་མོ་རྣམས་ཀྱི་རིམ་པ་འདི་ཡིན་ཏེ། དཀར་པོ་དང་། སེར་པོ་དང་། སྔོན་པོ་དང་། ནག་པོ་དང་། ཐམས་ཅད་ཀྱི་ནང་དུ་དམར་པོའོ། །དེ་རིགས་ཀྱི་བདག་པོ་ཡིན་པའི་ཕྱིར་རོ་ཞེས་པ་གྲུ་བཞི་པ་སྒོ་བཞི་ པ་རྟ་བབས་བཞིས་བརྒྱན།དྲ་བ་དང་དྲ་བ་ཕྱེད་པ་དང་། མེ་ཏོག་གི་ཕྲེང་བ་དང་། མེ་ལོང་ལ་སོགས་པས་བརྒྱན་པ། ཟླ་བ་དང་ཉི་མ་ལ་སོགས་པ་དང་ཡང་དག་པར་ལྡན་པ་བུམ་པ་དང་བཅས་པའོ། །དེ་ལྟར་དཀྱིལ་འཁོར་རྫོགས་ནས་དེའི་སྙིང་པོར་པདྨའི་མཚན་མ་དམར་པོའི་སྟེང་དུ་ཟླ་བའི་ མཚན་མ་གོ་ཡུའི་འབྲས་བུའི་ཚད་དུ་བྱའོ།།དེ་ལ་ཚོན་གདབ་པའི་དུས་སུ་ཚོན་སྣ་ལྔའི་སྣོད་རྔ་ཡབ་བཀུག་སྟེ་དབུས་སུ་ཚོན་དམར་བའི་སྣོད་ཤར་དུ་དཀར་པོ། ལྷོར་སེར་པོ། ནུབ་ཏུ་སྔོན་པོ། བྱང་དུ་ནག་པོ་ཡོངས་སུ་བཞག་ནས་དེ་རྣམས་ལ་ཧྲཱིཿོཾ་ཏྲཱཾ་ཨཱཿཧཱུཾ་ཞེས་པ་རྣམ་པར་བྲིས་ནས། ཨོཾ་པདྨ་ཨོཾ་ཀ་ཤ་ཧཱུཾ་ཕཊ་ཀྱིས་བསྲུངས་ནས། སྭ་བྷཱ་བ་ཤུདྡྷཿསརྦ་དྷརྨཱཿཞེས་བཀླགས་ནས་ནམ་མཁའ་རྣམ་པར་བལྟས་ནས་ཛཿཧཱུཾ་བཾ་ཧོཿཞེས་པས་ཡེ་ཤེས་པ་བཅུག་ནས། ཧྲཱིཿཧྲཱིཿཧྲཱིཿཧྲཱིཿཧྲཱིཿཞེས་པས་སོ་སོ་རེ་རེའི་ས་བོན་ལྔ་པ་དགོད་པར་བྱའོ། །སྣོད་དེ་རྣམས་སུ་ཨོཾ་བཛྲ་ཛྭཱ་ལ ཨ་ན་ལརྐ་ཧཱུཾ་ཞེས་པས་ནང་གི་ཚོན་ལས་འོད་ཟེར་སྤྲོས་པར་བྱའོ།།ོཾ་བཛྲ་བེ་ག་ཞེས་བརྗོད་ནས་ཡེ་ཤེས་ཀྱི་རི་མོ་བཀུག་པར་བྱས་ནས་ཚོན་སྣ་ལྔས་རེ་ཁཱ་ལྔ་པོ་རིམ་པས་དབང་ལྡན་ལ་སོགས་པ་རི་མོ་བྱ་ཞིང་ཀུན་དུ་བསྲུང་བ་ཡང་ངོ་། །དེ་ནས་དབུས་སུའོ། །དེ་ནས་ཐམས་ཅད་ དུ་རིམ་པ་བཞིན་ནོ།།དེ་བཞིན་དུ་དཀྱིལ་འཁོར་འདིའི་ཕྱི་རོལ་དུ་པདྨའི་ཕྲེང་བ་དམར་པོ། དེའི་ཕྱི་རོལ་དུ་དུར་ཁྲོད་སྣ་ཚོགས་མདོག་།དེའི་ཕྱི་རོལ་དུ་འབར་བའི་ཕྲེང་བའོ་ཞེས་པ་ཐམས་ཅད་བྱའོ། །རྒྱས་པ་ནི་དེ་ཁོ་ན་ཉིད་བསྡུས་པར་བརྗོད་དོ། །དེ་བཞིན་དུ་ཁྲུ་བཞི་ལ་སོགས་པ་ ནས་ཁྲུ་བརྒྱད་པ་དེ་སྲིད་རིམ་པ་ཁོ་ནའོ་ཞེས་སོ།།དཀྱིལ་འཁོར་རྫོགས་ནས་གཏོར་མ་སྦྱིན་པར་བྱའོ། །དེ་ནས་སློབ་དཔོན་ལངས་ནས་དཀྱིལ་འཁོར་གྱི་ཤར་དུ་ཉེ་བར་འདུག་པར་བྱའོ། །ཉེ་བར་འདུག་ནས་སྔར་བརྗོད་པའི་རིམ་པས་བསྟོད་པ་ལ་སོགས་པ་བྱའོ། །དེའི་རྗེས་སུ་ སྒྲུབ་ཐབས་སུ་བརྗོད་པའི་རིམ་པས་དཀྱིལ་འཁོར་རྣམ་པར་དག་པར་བསྒོམ་པར་བྱའོ།།དེ་ནས་མཆོད་པའི་ཡོ་བྱད་མཆོག་ཏུ་གྱུར་པ་ཐམས་ཅད་ཕུལ་ནས་བསམ་གཏན་གྱི་ཕྱག་རྒྱ་བཅིངས་ཏེ་ཡིད་གཡོ་བ་མེད་པར་བྱས་ནས་ཧྲཱིཿཡིག་ལས་འོད་ཟེར་ཀུན་དུ་སྤྲོས་ནས་དེའི་འོད་ཟེར་ རྣམས་ཀྱིས་ཕྱོགས་ཐམས་ཅད་དུ་གནས་པའི་དེ་བཞིན་གཤེགས་པ་རྣམས་རང་གི་སྙིང་གར་རབ་ཏུ་ཞུགས་པར་བསམ་པར་བྱའོ།།རྣམ་པར་བསམས་ནས་སླར་ཡང་རྣམ་པར་སྤྲོས་ནས་སེམས་ཅན་དེ་རྣམས་ལ་ཕན་པ་བྱེད་དུ་བཅུག་ནས་སླར་ཡང་རབ་ཏུ་ཞུགས་པར་བྱའོ། ། དེའི་རྗེས་སུ་གཡས་དང་གཡོན་དུ་ཞབས་བསིལ། དེ་བཞིན་དུ་སྔགས་དང་མཆོད་ཡོན་གྱི་སྣོད་གཉིས་ཕུལ་ནས་རྡོ་རྗེ་རྩེ་གསུམ་གྱི་ཕྱག་རྒྱས་བྱིན་གྱིས་བརླབ་པར་བྱས་ནས། ཨོཾ་ཨཱཿཧཱུཾ་ཞེས་པས་ལྷག་པར་གནས་པར་བྱའོ། །སྔགས་དང་གཡོན་གྱི་མཆོད་ཡོན་གྱི་སྣོད་བདུད རྩི་ལྔ་ལ་སོགས་པས་གང་བ་དེས་དམ་ཚིག་གི་མཆོད་པའི་རྫས་ལ་བསང་གཏོར་བྱའོ།།དེ་ནས་རིགས་ལྔ་པོ་དགོད་པར་བསྒོམ་པར་བྱའོ། །བྷྲཱུཾ་ཡིག་དཀར་པོ་མགོ་བོ་ལ། །ཉི་མ་དང་མཚུངས་ཧྲཱིཿཞལ་ལ། །ཧཱུཾ་ཡིག་ནག་པོ་སྙིང་ག་རུ། །གསེར་གྱི་འོད་ཅན་ཨཱཿལྟེ་བར། །གསང་བའི་ ཕྱོགས་སུ་ཁཾ་ལྗང་གུ།།བསམ་པར་བྱའོ་ཆོ་ག་ལས། །ཞེས་བྱས་ནས་རང་གི་ལྷའི་སྔགས་ཀྱིས་བདག་ཉིད་མཆོད་པར་བྱ་ཞིང་དབང་བསྐུར་བར་གསོལ་བ་གདབ་པར་བྱའོ། །ོཾ་ཨ་བྷི་ཥིཉྩ་ཏུ་མཱཾ་སརྦ་ཏ་ཐཱ་ག་ཏ་ཞེས་སོ། །ོཾ་བཛྲ་ཨརྒྷཾ་ཨཱཿ་ཧཱུཾ། ཨོཾ་བཛྲ་པུཥྤེ་ཨཱཿཧཱུཾ། ཨོཾ་བཛྲ་ ཨརྒྷཾ་པྲ་ཏཱིཙྪ་པཱ་དྱཾ་པྲ་ཏཱིཙྪ་ཞེས་བརྗོད་ནས་དམ་ཚིག་གི་མཆོད་པའི་རྫས་བྱིན་གྱིས་བརླབ་པར་བྱའོ།།དེ་ནས་ཨོཾ་བཛྲ་རཱ་ཛཱ་ཧཱུཾ་ཞེས་པས་རྡོ་རྗེ་བྱིན་གྱིས་བརླབས་ནས། ཨོཾ་བཛྲ་གཎྜེ་ཨཱཿཞེས་པས་དྲིལ་བུ་བྱིན་གྱིས་བརླབ་པར་བྱའོ། །དེ་ནས་ཨོཾ་ཨཱཿཡཱ་ཧཱི་བྷ་ག་བཱན། པདྨ་ཨཱ་བ་ ལོ་ཀི་ཏེ་ཤྭ་ར་སྭ་བྷཱ་བ་པྲཛྙཱ་པཎྜ་ར་བཱ་སི་ནཱི་ཨ་ལིརྒ་ཏ་ཀནྡྷ་ར་པྲ་པཱ་དཱཾ་ཙ་དཱ་ཡཱན་ཙ་ཀུ་རུ་པུ་ཛཾ་གྲྀཧྞ་ཨི་ཧ་སནྣི་ཧི་ཏོ་བྷ་བ་ཨ་དྷིཥྛཱ་ནཾ་ཀུ་རུ་མེ་སྭཱ་ཧཱ།ཞེས་པ་སྤྱན་དྲངས་པའི་ཚིགས་སུ་བཅད་པ་བཀླག་གོ། །ོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ་བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་བ་སུ་ཏོ་ཥྱོ་མེ་ བྷ་བ། ནུ་རཀྟོ་མེ་བྷ་བ། སུ་པོ་ཥྱོ་མེ་བྷ་བ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤེ་ཡཿཀུ་རུ་ཧཱུཾ། ཧ་ཧ་ཧ་ཧ་ཧོཿ། བྷ་ག་བཱན་སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་བ་མ་ཧཱ་ས་མ་ཡ་སཏྭ་ཨཱཿ། ཨོཾ་བཛྲ་གཎྜེ་ར་ནི་ཏ་པྲ་ར་ཎི་ཏ་སཾ་པྲ་ར་ཎི་ཏ་སརྦ་བུདྡྷ་ཀྵེ་ཏྲ་པྲ་ ཙ་ལི་ཏེ་པྲཛྙཱ་པཱ་ར་མི་ཏཱ་ནཱ་ད་སྭ་བྷཱ་བ་བཛྲ་དྷརྨ་ཧྲྀ་ད་ཡ་སནྟོ་ཥ་ནི་ཀ་རི་ཨོཾ་ཨཱཿཧཱུཾ་ཕཊ་ཅེས་དྲིལ་བུ་དང་རོལ་མོའི་སྒྲ་བྱའོ།།དེ་ནས་བདེ་བ་ཅན་གྱི་སངས་རྒྱས་ཀྱི་ཞིང་ན་གནས་པའི་ཡེ་ཤེས་ཀྱི་འཁོར་ལོ་ཡང་དག་པར་བཀུག་ནས་དཀྱིལ་འཁོར་ལ་བཅུག་པར་བསམ་སྟེ་དེ་ཡིད་ཀྱིས་ཕྱིའི་མེ་ཏོག་ ལ་སོགས་པའི་མཆོད་པ་དང་གསང་བའི་མཆོད་པ་བྱའོ།།ཕྱག་བྱ་བ་ལ་སོགས་པ་ཡང་ངོ་། །སརྦ་དེ་བ་ཏཱ་དེ་བ་ཏཱི་ནཾ་པ་ད་བནྡྷ་ནཾ་ཀ་རོ་མི། ཞེས་སོ། །དེ་ནས་བཅོམ་ལྡན་འདས་ཀྱི་ཕྲེང་བའི་སྔགས་བཟླས་པར་བྱའོ། །ན་མོ་བྷ་ག་བ་ཏི་པདྨ་ཨ་བ་ལོ་ཀེ་ཏེ་ཤྭ་རཱ་ཡ། བོ་དྷི་སཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀ་རུ་ཎི་ཀཱ་ཡ། ཙ་ཏུརྨུ་ཁཱ་ཡ། དྭཱ་ད་ཤ་ནེ་ཏཱ་ཡ། བཛྲ་པདྨ་ཨཾ་ཀུ་ཤ་པཱ་ཤ་ཀ་པཱ་ལ་ཁ་ཊྭཱཾ་ག་རཏྣ་པཱ་ཎ་ཡེ། སྭ་བྷཱ་པྲ་བྷཱ་པཎྜ་ར་ནཱ་སི་ནཱི་ཨཱ་ལངྒི་ཏ་ཀཾ་དྷ་རཱ་ཡ། བཱ་མི་ཙ་ཏུརྠ་བྷུ་ཛ་དེ་བི་སྟན་བ་ར་ཤ་ན་ར་ཏཱ་ཡ་བི་ཤ་ཨཉྫ། ཤ་ཤི་མ་དྷྱ་སྠཱ་ཡ་ད་ཧ་སརྦ་མཱ་རཱ་ན མ་དྷ་མ་དྷ་བྷཱུ་ཏ་བཻ་ཏཱ་ལ་ཀུམྦྷཾ་ཌ་ཡཀྵ་རཱཀྵ་སཱཾ་བཛྲེ་ཎ་ཙེ་ཥཱཾ་ཧྲྀ་ད་ཡཱ་ནི་བྷིཾ་ཛི་བྷཾ་ཛ།མཾ་མ་ནོ་ར་ཐཾ་པ་རི་པཱུ་ར་ཡ་སརྦ་བྷུ་མཱི་ཤྭ་ར་ཏུ་བྷྱཾ། ཧྲཱིཿཞེས་པས་རྡོ་རྗེ་དྲིལ་བུ་དཀྲོལ་བར་བྱའོ། །དེ་ནས་པདྨ་ཨཾ་ཀུ་ཤ་ཨཱཿཀཪྵ་ཡ་ཛཿ། པདྨ་པཱ་ཤ་པྲ་བེ+ེ་ཤ་ཡ་ཧཱུཾ། པདྨ་སྥོ་ཊ་བནྡྷ་ཡ་བཾ། པདྨ་ཨ་བེ+ེ་ ཤ་ཏོ་ཥ་ཡ་ཧོཿ།ཞེས་བཀླགས་ནས་དམ་ཚིག་དང་ཡེ་ཤེས་ཀྱི་དཀྱིལ་འཁོར་དག་འོ་མ་བཞིན་གཅིག་ཏུ་འདྲེས་པ་ཉིད་དུ་བྱའོ། །དེ་ནས་སྒྲུབ་པའི་ཐབས་ཀྱི་རྗེས་སུ་འབྲང་བས་དཀྱིལ་འཁོར་པ་རྣམས་ཀྱི་རང་གི་གཟུགས་ཕྱག་དང་ཁ་དོག་ལ་སོགས་པ་བསམས་ནས་ཨརྒྷཾ་པྲ་ཏཱིཙྪ་ ཞེས་པས་ཕུལ་ནས།མེ་ཏོག་ལ་སོགས་པའི་མཆོད་པ་རྣམས་རང་རང་གི་མིང་ཇི་ལྟ་བ་བཞིན་དུ་མཆོད་པར་བྱའོ། །དེ་ལ་ཇི་ལྟ་བ་བཞིན་དུ་རང་ལ་ལྷ་མོའི་གླུ་རྣམས་ཀྱིས་མཆོད་བཞིན་པ་དང་། ཕྱིའི་པི་ཝང་མ་ལ་སོགས་པའི་ལྷ་མོ་རྣམས་ཀྱིས་གར་གྱི་ཀུན་དུ་མཉེས་པར་ བསམ་པར་བྱའོ།།བཅོམ་ལྡན་འདས་མ་དེའི་སྔགས་རིམ་པ་བཞིན་དུ་བཟླས་པར་བྱས་ནས་མཆོད་པ་བྱའོ། །དེ་ལ་སྔར་ནི་སྒྲུབ་པའི་ཐབས་སུ་རིམ་པ་མིན་པས་བརྗོད་པ་འདིར་རིམ་པས་བཀླག་གོ། །ོཾ་པཱཾ་པརྞ་ཤ་བ་ར་བཱ་སི་ནི་ར་ཧྲཱིཿ་ཨོཾ་པཱཾ་ཧྲཱིཾ། ཨོཾ་ཧྲཱིཾ། པདྨ་ཨ་བ་ལོ་ཀི་ཏེ་ ཤྭ་ར་མ་ཧཱ་སུ་ཁ།པདྨོ་ཨཱཿཧཱུཾ་ཧྲིཾ། ཨོཾ་ཧྲཱི་ཧཱུཾ་ཧྲཾ་ཞེས་པ་བཅོམ་ལྡན་འདས་དང་། བཅོམ་ལྡན་འདས་མའི་རྩ་བའི་སྔགས་དང་སྙིང་པོ་རིམ་པས་སོ་ཞེས་པས་སྙིང་པོར་རོ། །ོཾ་པདྨ་ལོ་ཙ་ནི་ཧྲཱིཾ། ཨོཾ་རཏྣ་པདྨ་ཧྲཱིཾ། ཨོཾ་པདྨ་བཛྲ་ཎི་ཧྲཱིཾ། ཨོཾ་པདྨ་ཏཱ་རེ་ཧྲཱིཾ་ཞེས་པ་ཤར་ལ་སོགས་ པའི་ཕྱོགས་སུའོ།།ོཾ་པདྨ་བཱ་སི་ནི་ཧཱུཾ། ཨོཾ་པདྨ་ཛཱ་ལེ་ཧྲཱིཾ། ཨོཾ་པདྨ་བྷྲྀ་ཀུ་ཊི་ཧྲཱིཾ། ཨོཾ་པདྨ་ཤེ་ཁ་རེ་ཧྲཱིཾ་ཞེས་པ་མེ་ལ་སོགས་པའི་ཕྱོགས་བྲལ་རྣམས་སུའོ་ཞེས་པ་དང་པོའི་འདབ་མ་བརྒྱད་ལའོ། །ོཾ་པདྨ་ཨུལྐེ་ཧྲཱིཾ། ཨོཾ་པདྨ་ཡ་ཡེ་ཧྲཱིཾ། ཨོཾ་པདྨ་ཀྵེ་མེ་ཤྭ་རི་ཧྲཱིཾ། ཨོཾ་པདྨ་བཱ་ཏི་ ཧྲཱིཾ།ོཾ་པདྨ་ནི་བྷྱ་ཧྲཱིཾ། ཨོཾ་པདྨ་ཙཎྜེ་ཤྭ་རི་ཧྲཱིཾ། ཨོཾ་པདྨ་གུ་ཧྱེ་ཧྲཱིཾ། ཨོཾ་མ་ཧཱ་པདྨེ་ཧྲཱིཾ། ཨོཾ་པདྨ་ཙཎྜེ་ཧྲཱིཾ། ཨོཾ་པདྨ་ཨཱ་བྷེ་ཧྲཱིཾ། ཨོཾ་པདྨ་གཽ་རཱི་ཧྲཱིཾ། ཨོཾ་པདྨ་ཀོ་ཥེ་ཧྲཱིཾ་ཞེས་པ་གཉིས་པ་འདབ་མ་བཅུ་གཉིས་པ་ལའོ། །ོཾ་པདྨེ་ཤྭ་རི་ཧྲཱིཾ། ཨོཾ་པདྨ་མུ་ཁེ་ཧྲཱིཾ། ཨོཾ་པདྨ་ཙཎྜེ་ ཧྲཱིཾ།ོཾ་པདྨ་བི་དྷྱོ་མེ་ཧྲཱིཾ། ཨོཾ་པདྨ་སཱ་གཱ་རི་ཎི་ཧྲཱིཾ། ཨོཾ་པདྨ་པ་བྷ་ཀ་རི་ཧྲཱིཾ། ཨོཾ་པདྨ་ཙིནྟ་མ་ཎི་ཧྲཱིཾ། ཨོཾ་པདྨ་ཀཱ་མེ་ཧྲཱིཾ། ཨོཾ་པདྨ་རི་ཧྲཱིཾ། ཨོཾ་པདྨ་ཨམྦྷི་རེ་ཧྲཱིཾ། ཨོཾ་པདྨ་ལེ་ཁི་ཧྲཱིཾ། ཨོཾ་པདྨ་ཀཱ་ལི་ཧྲཱིཾ། ཨོཾ་པདྨ་སུ་ཁེ་ཧྲཱིཾ། ཨོཾ་པདྨ་ནེ་ཏྲ་ཧྲཱིཾ། ཨོཾ་པདྨ་ནི་དྷེ་ཧྲཱིཾ། ཨོཾ་པདྨ་ཡོ་ གེ་ཤྭ་རེ་ཧྲཱིཾ།ཞེས་པ་འདབ་མ་བཅུ་དྲུག་པ་ལའོ། །ོཾ་པདྨ་ཨཾ་ཀུ་ཤ་ཛཿཧཱུཾ་ཕཊ། ཨོཾ་ཧཱུཾ་པདྨ་པཱ་ཤ་ཧཱུཾ་ཕཊ། ཨོཾ་བཾ་པདྨ་སྥོ་ཊ་ཧཱུཾ་ཕཊ། ཨོཾ་ཧོཿཔདྨ་ཨཱ་བེ+ེ་ཤ་ཧཱུཾ་ཕཊ་ཅེས་སྒོ་རྣམས་སུའོ། །ོཾ་བེཏྟཱ་ལི་ཧཱུཾ་ཕཊ། ཨོཾ་གྷོ་ར་གྷོ་ར་ཥེ་ཧཱུཾ་ཕཊ། ཨོཾ་བཛྲ་དཾཥྚི་ཧཱུཾ་ཕཊ། ཨོཾ་མ་ཧཱ་ བ་ལེ་ཧཱུཾ་ཕཊ་ཅེས་པ་གྲཝ་རྣམས་སོ།།དེ་ལྟར་བཞི་བཅུ་རྩ་དྲུག་གི་དཀྱིལ་འཁོར་དང་དཀྱིལ་འཁོར་བའི་ལྷ་རྣམས་ཤར་དང་ལྷོ་ལ་སོགས་པའི་རིམ་པས་དང་། དེ་བཞིན་དུ་མེ་ལ་སོགས་པའི་རིམ་པས་ལུགས་དང་མཐུན་པས་མཆོད་པར་བྱའོ། །སློབ་དཔོན་གྱིས་གཡོན་སྐོར་གྱིས། དཀྱིལ་འཁོར་གྱི་གཡས་སྐོར་གྱིས་སོ། །ལྷ་འདི་རྣམས་ཀྱི་སྐུ་མདོག་དང་ཕྱག་དང་ཕྱག་མཚན་གྱི་རྣམ་པར་དག་པ་སྒྲུབ་པའི་ཐབས་ཀྱི་རྗེས་སུ་འདྲངས་ནས་རྟོགས་པར་བྱའོ། །དེ་ལ་ལྷ་དང་ལྷ་མོའི་རིམ་པ་གསུམ་ལ་ཁ་དོག་དཀར་པོ། སྒོ་སྐྱོང་གི་མཁའ་འགྲོ མ་རྣམས་སྒྲུབ་པའི་ཐབས་སུ་བརྗོད་པའི་སྐུ་མདོག་སྔགས་འདི་ལྟ་བུས་དཀྱིལ་འཁོར་གྱི་འཁོར་ལོ་ལ་ཡང་དག་པར་མཆོད་ནས་སླར་ཡང་སྔར་བརྗོད་པའི་བསྟོད་པས་བསྟོད་པར་བྱའོ།།བསྟོད་པས་སྐྱོ་བར་གྱུར་ན་བཟླས་པ་བྱའོ། །དེ་ནས་ཡཾ་རཾ་ཨཱཿོཾ་ཞེས་བདུད་རྩི་ལྔ་གཡོན་ ན་གནས་པའི་མཆོད་ཡོན་གྱི་སྣོད་ལྷག་པར་གནས་པ་དང་།ཁཾ་ཏྲཱཾ། ཨོཾ་ཧྲཱིཾ་ཧཱུཾ་ཞེས་པས་བདུད་རྩི་ལྔ་པོ་གཉིས་ཀ་ཞུ་ཞིང་ལྷུང་བར་བྱས་ནས། ཧཱུཾ་ཨཱཿོཾ་ཞེས་པ་རིམ་པ་ལས་བཟློག་པས་བདག་ཉིད་བྱིན་གྱིས་བརླབས་ནས། ཨོཾ་ཤོ་དྷ་ཡ་ཤོ་དྷ་ཡ། མཾ་ཧཱུཾ་ཨོཾ། རཀྵ་རཀྵ་ཧཱུཾ་ ཧཱུཾ་ཕཊ་སྭཱ་ཧཱ།ོཾ་པཉྩ་ཨ་མྲྀ་ཏ་མ་ད་ན་ཧཱུཾ། ཨོཾ་སརྦ་ཏ་ཐཱ་ག་ཏ་པཉྩ་ཨ་མྲྀ་ཏ་མ་ད་ན་པ་ར་མ་ར་སཱ་ཡ་ནཾ་བྷ་བ་ཧཱུཾ། ཨོཾ་སརྦ་ཏ་ཐཱ་ག་ཏ་པཉྩ་ཨ་མྲྀ་ཏ་མ་ད་ན་མཾ་པདྨ་ཨ་བ་ལོ་ཀི་ཏེ་ཤྭ་ར། མུ་ནི་པ་རི་ས་རཱུ་པཾ་ས་མ་གྲ་དེ་བཱི་བྲིནྷ་ས་ཧི་ཏེ་ཨ་བྷི་ཥིཉྩ་ཧཱུཾ། ཨོཾ་བཛྲ་མེ་དི་ནཱི་ཧཱུཾ། ཨོཾ་བྷཱུཾ་ཧཱུཾ། ཨོཾ་ ཏྲཻ་ལོཀྱ་བཱི་ར་ཧཱུཾ།ོཾ་ཙཎྜ་བཛྲ་པཱ་ཎ་ཡེ་ཧཱུཾ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཧཱུཾ། ཨོཾ་སརྦ་ཏ་ཐཱ་ག་ཏ་བཛྲ་ཨ་མྲྀ་ཏ་ཨུ་ད་ཀ་སརྦ་པྲེ་ཏ་པི་ཏཏྟྭི་ཎ་སནྟ་ར་པ་ཡ་ཧཱུཾ་ཞེས་པས་བདུད་རྩི་ལྔའི་ཆུས་ཀུན་ཏུ་ཚིམ་པར་བྱའོ། །དེ་ནས་དཀྱིལ་འཁོར་གྱི་ཁོར་ཡུག་ཏུ་གནས་པའི་བུམ་པ་རྣམས་ཀྱིས་མངོན་ པར་གཏོར་བར་བྱའོ།།དེ་ལ་དེ་རྣམས་ཀྱི་ངེས་པ་ཇི་ལྟ་བ་བཞིན་དུ་དཀྱིལ་འཁོར་གྱི་བདག་པོ་དང་ལྷན་ཅིག་དཀྱིལ་འཁོར་པ་རྣམས་བཞི་བཅུ་རྩ་བཞིར་འགྱུར་ཏེ། དཀྱིལ་འཁོར་གྱི་བདག་པོ་ནི་པདྨ་སྤྱན་རས་གཟིགས་ཀྱི་དབང་ཕྱུག་སྟེ་ལྷ་མོ་ནི་གོས་དཀར་མོའོ་ཞེས་པས་དེ་ལ་བཞི་ བཅུ་རྩ་དྲུག་སྟེ།དེའི་ཕྱིར་ཕར་ལ་བུམ་པ་ཡོངས་སུ་བརྟགས་པ་ལྷ་དང་མཚུངས་པའི་བུམ་པ་ཡོངས་སུ་གཞག་པར་བྱའོ། །ལས་ཐམས་ཅད་པ་བགེགས་མཐར་བྱེད་ཀྱི་བུམ་པ་ནི་དེའི་སྟེང་དུ་ལྷག་པའོ། །ཡང་ན་བཅུ་ཉིད་དོ། །དེ་མེད་པ་ལས་ལྔའོ་ཞེས་པ་རྒྱུད་ཐམས་ཅད་ལ་ ངེས་པའོ།།དེ་ལ་བཅོམ་ལྡན་འདས་དང་བཅོམ་ལྡན་འདས་མའི་ཐ་དད་པ་མེད་པའི་ཕྱིར་བུམ་པ་གཅིག་བྱིན་གྱིས་བརླབ་པ་ཁོ་ནའོ་ཞེས་པ་ཁ་ཅིག་གོ། །དེ་རྣམས་ནི་ཁོར་ཡུག་ཏུ་གནས་པའི་བུམ་པ་དཀར་པོ། མགྲིན་པ་གོས་དཀར་པོས་དཀྲིས་པ་འབྲུ་ལྔ་ལ་སོགས་པ་དང་ལྡན་པ་དེ་ རྣམས་ཡོངས་སུ་བཞག་ནས་མཆོད་ཡོན་དང་མེ་ཏོག་ལ་སོགས་པས་ཡང་དག་པར་མཆོད་དེ།སྔར་བརྗོད་པའི་བདུད་རྩི་ལྔས་ཀྱང་མངོན་པར་གཏོར་བར་བྱའོ་ཞེས་པ་དཀྱིལ་འཁོར་མཆོད་པ་ཇི་ལྟར་འབྱོར་པ་བྱས་ནས་ལྷ་མོས་དཀྱིལ་འཁོར་གྱི་གཙོ་བོ་ལ་བསྟོད་པར་བྱའོ། །ཕྱག་འཚལ་ ཕྱག་འཚལ་རྡོ་རྗེ་ཆེ།།ཕྱག་འཚལ་ཕྱག་འཚལ་བདེ་བ་ཆེ། །ཕྱག་འཚལ་ཕྱག་འཚལ་པདྨ་ཆེ། །ཕྱག་འཚལ་ཕྱག་འཚལ་དགའ་བ་ཆེ། །ཕྱག་འཚལ་ཕྱག་འཚལ་ཕྲིན་ལས་ཆེ། །ཕྱག་འཚལ་ཕྱག་འཚལ་ཁྱབ་བདག་ཆེ། །ཁྱོད་ལས་རྡོ་རྗེ་དང་སེམས་དཔའ། །ཁྱོད་ལས་ པདྨ་དྲི་མེད་མཛེས།།ཁྱོད་ལས་རིན་ཆེན་ལྷ་མོ་ཆེ། །སྣ་ཚོགས་རྡོ་རྗེ་དེ་བཞིན་ཉིད། །ཁྱོད་ལས་སངས་རྒྱས་དཔའ་བོ་ཆེ། །ཡང་དང་ཡང་དུ་འབྱུང་བར་བྱེད། །ཁྱོད་ལས་ཆོས་དང་དགེ་འདུན་ཡང་། །ཁྱོད་ལས་ཕ་རོལ་ཕྱིན་པའི་ཚོགས། །བྱང་ཆུབ་སེམས་དཔའ་ སེམས་དཔའ་ཆེ།།ཁྱོད་ལས་གཟུངས་ཀྱི་དཀྱིལ་འཁོར་ཏེ། །ཁྱོད་ལས་སྔགས་དང་ཕྱག་རྒྱ་དང་། །སླར་ཡང་ཁྲོ་བོའི་རྒྱལ་པོའི་ཚོགས། །ཞེས་པ་ལ་སོགས་པས་བསྟོད་པར་བྱའོ། །སླར་ཡང་བཟླས་པ་བྱ་ཞིང་དྲིལ་བུ་དཀྲོལ་བར་བྱའོ། །སྨོན་ལམ་གདབ་པར་བྱ་སྟེ། བདག་ནི་བུད་མེད་ཉིད་མིན་བདག་ཁོལ་དངོས་མ་ཡིན། །རྨོངས་པ་ཉིད་མིན་ཡུལ་ངན་རྣམས་སུ་སྐྱེ་བ་མིན། །བདག་ནི་ལོག་ལྟ་ཅན་གྱི་སྐྱེ་བར་འབྱུང་བ་མིན། །སྐྱེ་དང་སྐྱེ་བར་སངས་རྒྱས་གུས་པར་འགྱུར་བར་ཤོག་།སྐྱེས་པ་དང་ནི་སྐྱེ་བཞིན་མ། །མངལ་དུ་གནས་པའི་ལུས་སུ ཡང་།།གང་དུ་སངས་རྒྱས་ལྷ་མེད་པར། །ང་ཡི་རིགས་སུ་སྐྱེ་མི་འགྱུར། །དམ་ཚིག་རྣམ་པ་བརྒྱར་ཞིག་གུས་པ་ཞན་དང་གོས་ངན་དང་། །དྲི་མས་གོས་པའི་ལུས་དང་བརྩེ་མེད་སྡིག་པའི་ངང་ཚུལ་ཅན། །གཤིན་རྗེ་ཁྲོ་གཉེར་འཇིགས་ཤིང་ནད་ལྡན་སྡུག་བསྔལ་རབ་ཐོབ་ པ།།སྐྱེ་བོ་མི་བསྲུན་ཡོངས་སུ་གྱུར་ལ་འཇིག་རྟེན་མགོན་བདག་སྲུངས། །ཁྱོད་ཉིད་མ་དང་ཁྱོད་ཉིད་ཕ། །ཁྱོད་ཉིད་གཉེན་ཁྱེད་ཉིད་བླ་མ། །ཁྱོད་ཉིད་རིག་པ་ཁྱོད་ཉིད་རྫས། །ཁྱོད་ཉིད་པད་དབང་ཐམས་ཅད་ཡོད། །ཀུན་ཐོབ་ཡོད་པར་སྐྱབས་ཡོད་བྱེད། །ཀུན་ ཚེ་ཐམས་ཅད་གནས་ཡོད་བྱེད།།བཅོམ་ལྡན་འདས་ཁྱོད་རབ་རྫོགས་བྱེད། །འཇིག་རྟེན་མགོན་ཀྱེ་བདག་ལ་སྲུངས། །དབུལ་བ་ཉིད་དང་འཆི་བའི་སྡུག་བསྔལ་མང་པོ་ཟློག་བྱེད་པ། །དགོངས་པའི་དོན་རྣམས་ཐམས་ཅད་སྦྱིན་པ་ཡོངས་རྫོགས་པ། །འཇིག་རྟེན་མགོན་པོ་དཔལ་ ཞེས་ལྔ་པོ་འདི་ནི་རྒྱལ་བྱེད་ཀྱི།།གཞན་པའི་ཡི་གེ་བརྒྱ་ཕྲག་འབྲས་མེད་ཕལ་བས་ཆེ། །ཞེས་པ་སྨོན་ལམ་བྱས་ནས་གཏོར་མ་སྦྱིན་པར་བྱའོ། །དེ་ལ་མྱོས་བྱེད་དང་ཤ་དང་འབྲུ་བདུན་ཆུས་ཡོངས་སུ་གང་བར་བྱས་ནས་བདུད་རྩི་ལྔའི་ཆུས་མངོན་པར་གཏོར་ཏེ། ཨོཾ་ཨཱཿཧཱུཾ་གིས་བདག་ ཉིད་བྱིན་གྱིས་བརླབ་པར་བྱས་ནས།གཏོར་མ་བྱིན་གྱིས་བརླབ་པར་ཡང་བྱའོ། །དེ་ལ་གཏོར་མ་ལ་ཡེ་ཤེས་པ་བཅུག་ནས་ལྷ་དང་ལྷ་མ་ཡིན་དང་ཡི་དགས་དང་ཤ་ཟ་དང་དྲི་ཟ་རྣམས་བྱིན་གྱིས་བརླབ་པར་བྱའོ། །དེ་ནས་སྔགས་ཀྱིས་བྱིན་གྱིས་བརླབ་པར་བྱས་ནས་མཆོད་ཡོན་དང་། མེ་ཏོག་དང་། བདུག་པ་དང་། མར་མེ་ལ་སོགས་པས་མཆོད་པ་བྱའོ། །དེ་ལ་སྔགས་ཀྱི་ནི། ཨོཾ་ན་མོ་བྷ་ག་བ་ཏེ། ཨཱརྱ་ཨཱ་བ་ལོ་ཀེ་ཏེ་ཤྭ་རཱ་ཡ། བོ་དྷི་ས་ཏྭཱ་ཡ། མ་ཧཱ་ས་ཏྭཱ་ཡ། མ་ཧཱ་ཀཱ་རུ་ཎི་ཀཱ་ཡ། ཏདྱ་ཐཱ། དེ་བ། ཨ་སུ་ར། ག་རུ་ཌ། གནྡྷ་རྦྷ། མ་ནུ་ཥྱ། ཨ མ་ནུ་ཥྱ།པྲེ་ཏཱ་ས་པ་རི་བཱ་ར། ཏྲཻ་དྷཱ་ཏུ་ཀཱི་སྛཱི་ཏཱ། ཡེ་ཨ་ནྱ་ཙ། ཛྙཱ་ཏ་ཨ་ཛྙཱ་ཏཱཿཀུ་ཤ་ལ། ཨ་ཀུ་ཤ་ལཱ། ཏྲིཔྟ། ཨ་ཏྲིཔྟཱ། པཱ་པ། ཨ་པཱ་པ། ཀྲུ་དྷ། ཨ་ཀྲུ་དྷཿ་སཽ་མྱཻཿ། ཨ་སཽ་མྱཻཿ། ཤཱནྟ། ཨ་ཤཱནྟཱ། མཏྟཱཿ། ཨ་མ་དྷཱཿ། ཧྲཱི་ཥྚིཾ། ཨ་ཧྲཱི་ཥྚཾ། ས་ སནྟཱ་ནཱཿ། སནྟཱ་ནཱ། ས་རྀདྡྷ་ཀཱ། ཨ་རྀ་དྷི་ཀཱ། ས་པྲ་བྷཱ་བཿ། ཨ་པྲ་བྷཱ་བཿ། སྭ་སྭ་སྠ་ན་ནི་བཱི་ས་ནཱ་ཏྭེ། སརྦེ་པ་ར་ས་པ་ར་ཨ་བྷི་རོ་དྷཱི་ན། ཨི་མཾ་བ་ལི་མརྱ་མཱཾ་ས་ཨཱ་དི་ས་ཧི་ཏཾ་བྷུཉྫནྟུ་ཛཱི་གྷྲཾ་ཏུ། པི་བནྟུ་ས་མ་ཡཾ་རཀྵཾ་ཏུ་མ་མཱ་ཏི་ཀྲ་མནྟུ་སནྟུ་ཥྛཿ་པ་རི་པཱུ་ར་ཎཱ་ཨུ་དཱ་ར་བྷ་ བཾ་ཏུ། ནྱོ་ནྱ་ཀཱ་ལི་ནཱ། སརྦ་ཡ་བཱ་སུ་ཁཾ་པྲཱ་བྷུ་བནྟུ་ཀུ་ཀྵིན་པཱུ་ར་ཡཱནྟུ། ཨཉྫ་ཡཾ། ཨནྟ་པ་ན། ཨུ་པ་ལ། བནྟུ་ཡ་ཐཱ། བི་པྲཱ་བྷ་སུ་ཁཾ་པྲཱ་སྱ་སོ་ཀ་ནཱ་ནཾ། གཙྪནྟུ་སྭཱ་ཧཱ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུཏྤནྣ་ཏྭཱཏ། ཨོཾ་ཨཱཿཧཱུཾ་ཕཊ་སྭཱ་ཧཱ། ཞེས་གཙོ་བོའི་གཏོར་མ་ དང་།ཡང་། ཨོཾ་ཧཱ་རཱི་ཏྱཻ་ཡཀྵི་ཎྱི། ཨི་མཾ། པཎྜཾ། པ་ཡ་ཙྪ་བ་སྭཱ་ཧཱ། ཨོཾ་པྲི་ཡཾ་ཀཱ་རཱ་ཡ་སྭཱ་ཧཱ། ཨོཾ་བཛྲ་ཡཀྵཱ་ཡ་སྭཱ་ཧཱ། ཞེས་པས་ཆང་བུ་དང་བཅས་པའི་གཏོར་མ་སྦྱིན་པར་བྱའོ། །དེ་ནས་སླར་ཡང་ཡང་དག་པར་མཆོད་པར་བྱའོ། །དེ་ནས་གཏོར་མ་རྣམས་ གཤེགས་པའམ་མི་གཤེགས་པའོ།།སློབ་མ་ལ་དབང་བསྐུར་བ་བརྩམ་པར་བྱའོ། །དེའི་རྗེས་སུ་སློབ་མ་རྣམས་བརྒྱན་པར་བྱས་ནས་མེ་ཏོག་གི་ཕྲེང་བ་རྣམས་བཟུང་སྟེ། པུས་མོ་ས་ལ་བཙུགས་ནས་སྔགས་ཀྱི་ཚུལ་བྱུང་བ་ཉིད་ལ་བསོད་ནམས་འདོད་པ་ཁ་ཅིག་དཀྱིལ་འཁོར་ འདིར་རབ་ཏུ་འཇུག་པར་བྱེད་དེ།འཇིག་རྟེན་ཕ་རོལ་ཉེར་བརྟེན་པའི། །དད་པ་མང་དུ་བྱས་ནས་ནི། །བློ་ལྡན་དཀྱིལ་འཁོར་འདིར་འཇུག་བྱའི། །འདི་ཡི་འབྲས་བུ་གཉེར་མི་བྱ། །ཞེས་རྗེས་སུ་བསྟན་ནས་སངས་རྒྱས་ཀྱི་གཟུགས་སུ་བྱའོ། །དེ་ནས་དེ་རྣམས་ཁོ་ན་བླ་མ་ལ་ གསོལ་བ་འདེབས་སུ་གཞུག་གོ།།བྱང་ཆུབ་རྡོ་རྗེ་སངས་རྒྱས་ལ། །མཆོད་ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་པའི་དོན་གྱི་ཕྱིར། །ནམ་མཁའི་རྡོ་རྗེ་དེང་གསོལ་ཀྱེ། །ཞེས་གསོལ་བ་གདབ་པ་དང་ལྡན་པའི་སློབ་མ་རྣམ་པར་འདུད་པ་ལ་མི་བསྐྱོད་པའི་གཟུགས་སུ་ དམིགས་ནས།རང་གི་རིག་མ་སྐྱེས་བུ་རྡོ་རྗེ་ཅན་དུ་བསམས་ནས་རྡོ་རྗེ་སེམས་སུ་རབ་ཏུ་བསྒོམས་པས་ཁོར་ཡུག་གི་བུམ་པ་བརྒྱད་ཀྱི་ཆུས་གཏོར་བར་བྱའོ། །དེ་ནས་རྡོ་རྗེ་ཁུ་ཚུར་གྱིས་བུམ་པའི་ཆུ་བླངས་ནས། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡིས་ཕྱག་བྱས་ པ།།གསང་བ་གསུམ་གྱི་གནས་ལས་བྱུང་། །སངས་རྒྱས་ཀུན་གྱིས་སྦྱིན་པར་བྱེད། །ོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུཾ་ཞེས་སློབ་མ་འཁོར་ལོས་སྒྱུར་བ་ལྟ་བུར་དབང་བསྐུར་བར་བྱའོ། །ཆུའི་དབང་བསྐུར་བའི་ཆོ་ག་མེ་ལོང་ཡེ་ཤེས་སོ། །དེ་ནས་བཤད་མ་ཐག་པ་ལ་ སོགས་པའི་རིམ་པས་གསེར་རམ་གོས་ལས་བྱས་པའི་ཅོད་པན་སློབ་མའི་མགོ་ལ་སྦྱིན་པར་བྱའོ།།རིན་ཆེན་འབྱུང་ལྡན་གྱི་རབ་ཏུ་སྦྱོར་བ་ལས་ནམ་མཁའི་མཐིལ་དུ་སོན་པའི་དེ་བཞིན་གཤེགས་པ་ཐམས་ཅད་རིགས་ཀྱི་བདག་པོའི་གཟུགས་ཀྱིས་ཅོད་པན་ཁོ་ ནར་གནས་པར་བསམ་པར་བྱའོ།།ོཾ་ཨཿབཛྲ་མུ་ཀུ་ཊ་ཨ་བྷི་ཥིཉྩ་ཧཱུཾ་སུ་ར་ཏ་སྟྭཾ་ཨ་ཧཾ། ཞེས་པས་ཅོད་པན་བལྟ་བར་བྱའོ། །སླར་ཡང་ཅོད་པན་གྱི་གནས་སུ་ཨོཾ་བཛྲ་དྷཱ་ཏྭཱི་ཤྭ་རི་ཨ་བྷི་ཥིཉྩ་ཧཱུཾ། ཨོཾ་ས་ཏྭ་བཛྲི། རཏྣ་བཛྲི། དྷརྨཱ་བཛྲི། ཀརྨ་བཛྲི། ཨ་བྷི་ཥིཉྩ་ཧཱུཾ། འདིས་ ནང་གི་པདྨ་འདབ་བརྒྱད་ཀྱི་ཕྱོགས་སུ་གནས་པའི་ལྷ་མོ་བརྗོད་པ་རྣམས་དང་།དབུས་ཀྱི་གོས་དཀར་མོ་ནི་རྡོ་རྗེ་དབྱིངས་ཀྱི་དབང་ཕྱུག་མར་ཤེས་པར་བྱའོ་ཞེས་པས་མཉམ་པ་ཉིད་ཡེ་ཤེས་ཏེ་ཅོད་པན་གྱི་དབང་བསྐུར་བའོ། །དེ་ནས་རྡོ་རྗེ་ཆེན་པོ་རྩེ་མོ་ལྔ་པ་སྙིང་ག་ལ་སོགས་པའི་ གནས་རྣམས་སུ་བཞག་ནས་ལག་པ་གཡས་པས་གཏད་པར་བྱའོ།།སློབ་མ་རྡོ་རྗེ་སེམས་དཔའ་ཞེས་བྱ་བ་འཇིག་རྟེན་དབང་ཕྱུག་གི་རྣམ་པ་ལ་གཏད་པར་བྱའོ། །སངས་རྒྱས་རྡོ་རྗེ་དབང་བསྐུར་ལ། །དེ་རིང་ཁྱོད་ལ་དབང་བསྐུར་གྱུར། །སངས་རྒྱས་ཐམས་ཅད་རབ་བསྒྲུབ་ ཕྱིར།།རྡོ་རྗེ་འདི་དེ་ཁྱོད་ཀྱིས་གཟུང་། །ཞེས་བཀླགས་ནས་ལག་པ་གཡས་སུ་རྡོ་རྗེ་སྦྱིན་པར་བྱའོ། །སོ་སོར་རྟོག་པ་ཡེ་ཤེས་རྡོ་རྗེའི་དབང་བསྐུར་བའོ། །དེ་ནས་དོན་ཡོད་གྲུབ་པའི་གཟུགས་ཀྱིས་དྲིལ་བུ་ལག་པ་གཡོན་དུ་བྱིན་ནས། ཨོཾ་བཛྲ་ཨ་དྷི་པ་ཏི་སྟྭཾ། ཨ་བྷི་ ཥིཉྩཱ་མི་ཏིཥྛ་ས་མ་ཡ་སྟྭཾ།ཞེས་བཀླགས་ནས་ལག་པ་གཡོན་དུ་སྟེ་དྲིལ་བུའི་དབང་བསྐུར་བའི་ཆོ་ག་བྱ་བ་ནན་ཏན་གྱི་ཡེ་ཤེས་སོ། །དེ་ནས་སློབ་མ་རྣམ་པར་སྣང་མཛད་དུ་བྱིན་གྱིས་བརླབས་ནས། མགོ་བོར་རྡོ་རྗེ་དྲིལ་བུ་བྱིན་ཏེ། ཨོཾ་བཛྲ་སཏྭ་སྟྭཾ། ཨ་བྷི་ཥིཉྩཱ་མི། བཛྲ་ ནཱ་མ་ཨ་བྷི་ཥེ་ཀ་ཏཿ།ཀྱེ་དཔལ་གཏི་མུག་རྡོ་རྗེ། ཀྱེ་དཔལ་ཞེ་སྡང་རྡོ་རྗེ། ཞེས་མིང་གི་དབང་བསྐུར་བར་བྱའོ་ཞེས་པ་ལ་སོགས་པ་རིགས་དང་རྗེས་སུ་མཐུན་པའི་མིང་གི་དབང་བསྐུར་རོ། །ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་སོ། །མངོན་པར་ དབང་བསྐུར་བ་ལྔ་པོ་འདི་རྣམས་ཀྱིས་ཀྱང་སློབ་མ་སྔགས་དང་རྒྱུད་ཉན་པ་དང་བཤད་པ་དང་སྒྲུབ་པ་ལ་དབང་བར་བྱས་པར་འགྱུར་རོ།།དབང་བསྐུར་བ་ལྔ་པོ་རིག་པའི་དབང་བསྐུར་བ་ཞེས་བརྗོད་པར་བྱ་སྟེ། ཐམས་ཅད་དུ་སྤྱན་མ་ལ་སོགས་པའི་རིག་མ་རྣམས་ཀྱིས་བྱ་བའི་ཕྱིར་རོ། ། དེའི་བར་མ་ཆད་པར་འདུལ་བས་སློབ་མ་དོན་དུ་གཉེར་བ་དང་ལྡན་པ་ལ། བླ་མས་སློབ་དཔོན་གྱི་དབང་བསྐུར་བར་བྱ་སྟེ། ཇི་ལྟར། གང་གི་བདག་ནི་ཁྱོད་དྲིན་ལས། །རང་དང་གཞན་དོན་ནུས་འགྱུར་བ། །རྡོ་རྗེ་སློབ་དཔོན་གྱི་ནི་དབང་། །ཐུགས་རྗེའི་གཏེར་གྱིས་བདག་ལ སྩོལ།།ཞེས་གསོལ་བ་འདེབས་པ་དང་ལྡན་པའི་སློབ་མ་རྒྱན་ཐམས་ཅད་ཀྱིས་བརྒྱན་པ་སྟེང་དུ་གདུགས་དང་རྒྱལ་མཚན་དང་བླ་རེ་ལ་སོགས་པས་བརྒྱན། ཤར་གྱི་སྒོར་སེང་གེའི་ཁྲི་ལ་གནས་པ་སྣ་ཚོགས་པདྨ་འདབ་མ་བརྒྱད་པའི་སྟེང་དུ་རྡོ་རྗེ་སེམས་དཔའི་གཟུགས་སུ་དམིགས་ ནས་ཧཱུཾ་ཡིག་ལས་སྐྱེས་པའི་རྡོ་རྗེར་བསམས་ནས།ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའི་བདེ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་པའི་བདག་པོ་བདག་།དཔལ་མཆོག་དང་པོའི་སྐྱེས་བུ་ཁྱེད། །ཅེས་དེ་ཁོ་ན་ཉིད་ཀྱིས་ གཟུང་བར་བྱའོ།།དེའི་རྗེས་སུ། ཨཱཿཡིག་ལས་སྐྱེས་པའི་དྲིལ་བུ། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་བཅང་། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་པས་ལག་པ་གཡོན་དུ་སྦྱིན་པར་ བྱའོ།།དེའི་རྗེས་སུ། ཡིད་ཀྱི་ལུས་ནི་བརྟན་པའི་ཕྱིར། །ཕྱག་རྒྱའི་དམ་ཚིག་རབ་ཏུ་བརྗོད། །གང་གི་ལུས་ནི་ཐམས་ཅད་བརྟན། །དེས་ན་ཕྱག་རྒྱ་རབ་ཏུ་གྲགས། །ཞེས་པ་འདིས་རང་གི་འདོད་པའི་ལྷའི་སྐུ་རུ་ནང་གི་བདག་ཉིད་ཅན་གྱི་ཕྱག་རྒྱ་ཆེན་པོ་ལྷག་པར་གནས་པ་ ལ་འཁྱུད་པར་བྱའོ།།དེའི་རྗེས་སུ་སློབ་དཔོན་རང་གི་སྙིང་གའི་ས་བོན་ལས་བྱུང་བ་ནམ་མཁར་གནས་པའི་ལྷའི་ཚོགས་ཀྱིས་མངོན་པར་དབང་བསྐུར་བཞིན་པར་བསམས་ནས། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡི་ཕྱག་བྱས་པ། །གསང་གསུམ་ གནས་ལས་ཡང་དག་བྱུང་།།སངས་རྒྱས་ཀུན་གྱི་སྦྱིན་པར་བྱེད། །ཅེས་མངོན་པར་དབང་བསྐུར་བར་བྱའོ། །ཇི་ལྟར་གསུངས་པ། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་ལས། །ཁྱོད་ ནི་སློབ་དཔོན་འབྱུང་བར་འགྱུར།།ཞེས་སློབ་དཔོན་དུ་དབང་བསྐུར་བར་འདོད་དོ། །དེའི་ཆེད་དུ་སློབ་དཔོན་དུ་དབང་བསྐུར་བའི་དབང་དུ་བྱ་བ་དེའི་ཆེད་དུ་བྱིན་ནོ། །དཀྱིལ་འཁོར་གྱི་དེ་ཁོ་ན་ཉིད་དང་། དཀྱིལ་འཁོར་གྱི་རྣམ་པར་དག་པ་མདོར་བསྡུས་ནས་བཤད་པར་བྱ་སྟེ། ཇི་ ལྟར་དཀྱིལ་འཁོར་པདྨ་ཞེས་སུ་བརྗོད།།ཡིད་ཀྱི་དཀྱིལ་འཁོར་བཤད་པར་བྱ་སྟེ། ཁང་བརྩེགས་ཞེས་པ་ཡེ་ཤེས་ཏེ། །སེམས་ཀྱི་བརྩེགས་པ་ཡང་དག་བསྒྲེང་། །ཕུང་པོ་ལྔ་ཡི་རང་བཞིན་གྱིས། །སངས་རྒྱས་ལྔ་རུ་རབ་ཏུ་གྲགས། །དེ་ཕྱིར་རྣམ་པར་སྣང་མཛད་ཀྱི་ གཟུགས་སུ་དམིགས་པའི་སློབ་མ་ལ་རྗེས་སུ་གནང་བ་སྦྱིན་པར་བྱའོ།།འཇིག་རྟེན་ཀུན་ལ་ཐམས་ཅད་ནས། །དངོས་གྲུབ་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པ། །ཆོས་ཀྱི་འཁོར་ལོ་རབ་ཏུ་བསྐོར། །ཆོས་ཀྱི་གནས་སུ་རྡོ་རྗེ་དང་རིན་ཆེན་དང་། ལས་ དང་ཁྲོ་བོའི་སྒྲ་གཅིག་པའི་ཚིགས་སུ་བཅད་པས་རྗེས་སུ་གནང་བ་སྦྱིན་པར་བྱའོ།།དེའི་རྗེས་སུ་རྡོ་རྗེའི་བརྟུལ་ཞུགས་སྦྱིན་པ་དང་། ལུང་བསྟན་པ་དང་། དབུགས་དབྱུང་བ་སྦྱིན་ནོ་ཞེས་པ་རྒྱུད་ཐམས་ཅད་ཀྱི་རྗེས་སུ་འབྲངས་པ་སྦྱིན་པར་བྱའོ། །དེ་ལྟར་སློབ་དཔོན་དུ་དབང་ བསྐུར་བས་རྡོ་རྗེ་རྣམ་པར་སྦྱང་བར་བྱའོ།།གསང་བ་གསུམ་གྱི་དབང་བསྐུར་བས་གསུང་གི་རྡོ་རྗེ་ཡང་རྣམ་པར་སྦྱང་བར་བྱ་སྟེ། དེ་ལྟ་བུའི་རིམ་པས་རྒྱུད་ཐམས་ཅད་ལ་བརྗོད་པའི་ཆོ་གས་དབང་བསྐུར་དགུས་གྲོལ་བ་སྦྱིན་པར་བྱའོ། །དེ་ལ་རིམ་པ་ནི། ཆུ་དང་ཅོད་པན་རྡོ་རྗེ་དང་ ནི་དྲིལ་བུ་ལ་སོགས་མིང་།།རིགས་གསུམ་དམ་ཚིག་སྐལ་ལྡན་སློབ་དཔོན་གསང་བ་མཆོག་སོགས་ཀྱིས། །དབང་བསྐུར་རྣམ་པ་དགུ་པོ་གང་གི་མཚུངས་མེད་བསོད་ནམས་ཀྱིས། །སྐྱེར་འཇུག་སྲིད་པ་དག་པ་བླ་མ་ཚོགས་དེ་ལ་ཕྱག་འཚལ། །ཞེས་པ་ཕྱག་བྱས་ནས་ དབང་བསྐུར་བ་ཐམས་ཅད་ཐོབ་ནས།དེ་ནས་སློབ་མས་ལུས་ལ་སོགས་པ་ཅི་རིགས་པའི་ཡོན་དབུལ་བར་བྱའོ། །བླ་མས་ཀྱང་ཞེན་པ་མེད་པའི་སེམས་ཀྱིས་བླངས་ནས་དེ་ལ་བཀྲ་ཤིས་བརྗོད་པར་བྱའོ། །དེ་ནས། བཅོམ་ལྡན་སངས་རྒྱས་བཀྲ་ཤིས་དང་། །ཆོས་དང་ དགེ་འདུན་བཀྲ་ཤིས་དང་།།བསོད་ནམས་འདི་ཀུན་ཉིད་ཀྱིས་ནི། །སློབ་མ་རྣམས་ཀྱི་བཀྲ་ཤིས་ཤོག་།ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨོ་རྒྱས་པ་འདབ་འདྲའི་སྤྱན་མངའ་བ། ། བཀྲ་ཤིས་དེ་ནི་ཁྱོད་ལ་ཞི་བར་བྱེད་གྱུར་ཅིག་།དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །དེ་ནི་ཁྱོད་ལ་འཇིག་རྟེན་བཀྲ་ཤིས་གཉིས་པའོ། །དགེ་འདུན་དམ པའི་ཆོས་ལྡན་ཐོས་པའི་བཀྲ་ཤིས་ཕྱུག་།མི་དང་ལྷ་དང་ལྷ་མ་ཡིན་གྱིས་མཆོད་པའི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །དེ་ནི་ཁྱོད་ལ་འཇིག་རྟེན་བཀྲ་ཤིས་གསུམ་པའོ། །ཞེས་སློབ་མ་རྣམས་ལ་བཀྲ་ཤིས་སྦྱིན་པར་བྱའོ། །དེ་རྣམས་བསྔགས པ་དང་།།དེ་ནས་སློབ་མ་དེ་རྣམས་རེ་རེ་ནས་རིམ་པས་ཕྱག་འཚལ་ནས་འགྲོར་གཞུག་གོ། །དེ་ནས་བླ་མ་སླར་ཡང་མཆོད་པ་དང་བསྟོད་པ་བརྗོད་པ་ལ་སོགས་པ་ཐམས་ཅད་བྱའོ། །གཞན་ཡང་ཐིག་ལེའི་རྣལ་འབྱོར་ལ་སོགས་པ་བསྒོམ་པར་བྱ་བའི་ཐབས་སུ་བཤད་པའི་ཆོ་གས་བྱས་ ནས་གཅིག་གམ་ལྔའམ་བདུན་ནམ་ལྔ་བཅུའམ།བརྒྱད་ལྷག་པའི་བརྒྱར་གཏོར་མ་བྱིན་ནས་མཆོད་པ་བྱས་ཏེ་དཀྱིལ་འཁོར་དང་དཀྱིལ་འཁོར་གྱི་བདག་པོའི་ལྷ་རྣམས་བཟོད་པར་མཛོད་ཅིག་བཟོད་པར་མཛོད་ཅིག་ཅེས་བརྗོད་ནས་དཀྱིལ་འཁོར་ལ་བསྐོར་བ་བྱས་ཏེ་གཏོར་མ་ ཡང་ངོ་།།སླར་ཡང་ཉེ་བར་འདུག་སྟེ་ཡང་དག་པར་བསྟོད་ནས་ཨོཾ་བཛྲ་མུཿཞེས་བཟླས་ཏེ་རོལ་མོའི་སྒྲས་གཏོར་མ་གཤེགས་སུ་གསོལ་བར་བྱའོ། །དཀྱིལ་འཁོར་དང་ཡེ་ཤེས་ཀྱི་དཀྱིལ་འཁོར་གྱི་སེམས་དཔའི་རང་གི་ངོ་བོ་བཛྲ་མུཿཞེས་བཀླགས་ནས། ཁྱེད་ཀྱིས་སེམས་ ཅན་དོན་ཀུན་མཛད།།རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང་། །སླར་ཡང་འབྱོན་པར་མཛད་དུ་གསོལ། །ོཾ་བཛྲ་མུཿཞེས་པས་ཡེ་ཤེས་སེམས་དཔའ་གཤེགས་སུ་གསོལ་བར་བྱའོ། །དམ་ཚིག་གི་དཀྱིལ་ འཁོར་རང་གི་སྙིང་གའི་ས་བོན་ལ་རབ་ཏུ་གཞུག་པར་བྱའོ་ཞེས་སོ།།དཀྱིལ་འཁོར་གྱི་རྡུལ་ཚོན་ནི་ཀླུང་གི་གནས་སུ་རབ་ཏུ་གཞུག་པར་བྱའོ། །གཞན་ཉི་མ་གཉིས་པ་ལ་རྣམ་ཐོས་སྲས་ལ་སོགས་པའི་གཏོར་མ་སྦྱིན་པར་བྱའོ་ཞེས་པ་རྒྱུད་ལས་གསུངས་པ་ངེས་པའོ། །པདྨ་སྤྱན་ རས་གཟིགས་དབང་གི་།དཀྱིལ་འཁོར་མཆོད་པའི་ཆོ་ག་ནི། །འཇིག་རྟེན་རྣམས་ལ་ཕན་འདོད་པས། །རྒྱལ་དཔལ་ཡེ་ཤེས་ཀྱིས་བྱས་པའི། །བསོད་ནམས་དེ་ལས་སྐྱེ་དགུར་བཅས། །རྟག་ཏུ་སྐྱེ་དགུ་བདེ་ལྡན་འགྱུར། །བདག་ཀྱང་བསོད་ནམས་འདི་ཡིས་ནི། ། ཀུན་མཁྱེན་གོ་འཕང་ཐོབ་གྱུར་ཅིག་།ཅེས་པ་པདྨ་སྤྱན་རས་གཟིགས་དབང་ཕྱུག་གི་པདྨ་དྲ་བའི་རིམ་པས་བཅོམ་ལྡན་འདས་ཀྱི་དཀྱིལ་འཁོར་མཆོད་པའི་ཆོ་ག་རྫོགས་སོ།། །།རྒྱལ་བ་དཔལ་ཡེ་ཤེས་མིང་གཞན་པདྨ་རྡོ་རྗེ་ཞེས་བྱ་བས་མཛད་པ་རྫོགས་སོ།། །།